Ն.Ա.Տ. Սահակ Բ. Պատրիարք Հայրը, 20 Սեպտեմբեր 2022, Երեքշաբթի, յետ միջօրէին, ընդունեց Կղզեաց Հոգեւոր Հովիւ Հոգշ. Տ. Յարութիւն Վրդ. Տամատեանը։
Սրբազան Պատրիարք Հօր օրհնութեամբ եւ Ամերիկայի Արեւելեան Թեմի Առաջնորդ՝ Հոգշ. Տ. Մեսրոպ Վրդ. Պարսամեանի համամտութեամբ ու օրհնութեմբ, Հայր Սուրբը, Հինգշաբթի միջօրէին պիտի ճամբորդէ դէպի Նիւ Եորք եւ ժամանակաւորապէս իր կեցութիւնը պիտի հաստատէ Ս. Ներսէս Ճեմարանէ ներս։ Այս շրջանին Հայր Սուրբը, Արեւելեան Թեմի Առաջնորդութեան ենթակայ ըլլալով պիտի մասնակցի նաեւ զանազան արարողութեանց, ինչպէս նաեւ մասնակից պիտի ըլլայ Ս. Ներսէս Ճեմարանի առօրեային։
Նախ քան ուղեւորութիւնը, Հայր Սուրբը, օրհնութիւնը ստացաւ Մեր Հոգեւոր Պետին եւ շնորհակալութիւն յայտնեց իր հայրական հոգածութեան համար։ Պատրիարք Հայրը, անդրադառնալով Հայր Սուրբի ամրան շրջանի ծառայութեան իր գնահատանքը յայտնեց։ Ուղեւորութեան սեմին հայրական թելադրութիւններ ընելով, օրհնութիւնը տուաւ Աթոռոյս երիտասարդ միաբանին եւ յաջողութիւն մաղթեց իրեն սոյն կեցութեան շրջանին։
Ինչպէս ծանօթ է, Հայր Սուրբը, Պատրիարք Հօր օրհնութեամբ եւ Ազգիս Վեհափառ Հայրապետ՝ Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսի եւս օրհնութեամբ, անցեալ տարի ուղեւորուած էր Մայր Աթոռ եւ Յունիս ամսուան մէջ ստացած՝ վարդապետական գաւազանը։
Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad
İlk yorum yapan siz olun