İçeriğe geçmek için "Enter"a basın

Այդ փոփոխությունները չէին կարող տեղի ունենալ առանց Սփյուռքի միանշանակ աջակցության. Փաշինյանը՝ Արամ Ա-ին

Վարչապետի պաշտոնակատար Նիկոլ Փաշինյանը Լիբանան կատարած աշխատանքային այցի շրջանակում հոկտեմբերի 21-ին Անթիլիասում հանդիպում է ունեցել Ն.Ս.Օ.Տ.Տ. Արամ Ա Մեծի Տանն Կիլիկիո Կաթողիկոսի հետ:

Հանդիպումից առաջ Նիկոլ Փաշինյանը Արամ Ա Կաթողիկոսի ուղեկցությամբ այցելել է Մայրավանքի Սուրբ Գրիգոր Լուսավորիչ Մայր Տաճարի հարեւանությամբ կառուցված Հայոց ցեղասպանության զոհերի հիշատակը հավերժացնող մատուռ, ծաղիկներ դրել եւ հարգանքի տուրք մատուցել ցեղասպանության զոհերի հիշատակին:

Այնուհետեւ տեղի է ունեցել ՀՀ վարչապետի պաշտոնակատարի եւ Արամ Ա Կաթողիկոսի առանձնազրույցը:

Ն.Ս.Օ.Տ.Տ. Արամ Ա Մեծի Տանն Կիլիկիո Կաթողիկոսն իր ողջույնի խոսքում նշել է. «Սիրելի պարոն վարչապետ, մեկ անգամ անհուն ուրախությամբ ողջունում եմ Ձեր ներկայությունը Ձեր տանը: Եկեղեցին մեր ժողովրդին է պատկանում. մենք ժողովրդից ենք գալիս, ժողովրդին ենք պատկանում եւ կոչված ենք մեր ժողովրդին ծառայել: Սա մեր ժողովրդի, հայրենիքի տունն է, մենք այս հասկացողությամբ ենք կազմավորվել եւ մեր ուսումն ենք առել այստեղ: Երբ Կիլիկիան կորցրեցինք որպես թագավորություն եւ որպես հող, մենք հոգեւոր Կիլիկիան ստեղծեցինք: Այս գործոնը հոգեւոր Կիլիկիայի ծագմանը, զարգացմանը մեծապես նպաստեց, ինչպես առավոտյան Ձեր խոսքի մեջ ակնարկեցիք, եւ այս աթոռի առաքելությունն է` մեր ժողովրդի կյանքում կենսագործել մեր հոգեւոր, առօրեական, մշակութային, ազգային արժեքները:

Մենք Հայաստանը երազեցինք, Հայաստանն ուզեցինք մեր երազի պատկերով տեսնել, ազատ, անկախ Հայաստան երազեցինք եւ ունեցանք: Հետեւաբար, այս աթոռի հիմնական մասը ներկայացնում է Հայաստանի հզորությունը, եւ ես ուրախ եմ անձնապես, որ ինչպես եկեղեցու մեջ ասեցի, մեր հայրենիքի ժամանակակից պատմության մեջ մի նոր էջ բացվեց` հույսի եւ սիրո, միասնության եւ տեսլականի, Հայաստանի ապագային առնչվող նոր էջ: Եվ ես առաջին իսկ օրվանից կոչ ուղղեցի մեր ժողովրդին` ոչ միայն հեռվից հպարտանալու, ուրախանալու, այլեւ մասնակից դառնալու Հայաստանի վերակերտման, հզորացման աշխատանքներին: Հետեւաբար, այս առիթոց մեկ անգամ եւս Ձեզ հայտնում եմ, որ այս աթոռն իր թեւերով, եւ ես անձնապես ամբողջական իմաստով նեցուկ եմ Ձեզ, որովհետեւ Ձեր հաջողությունը Հայաստանի հաջողությունն է: Հետեւաբար, մենք բոլորս ցանկանում ենք, որ հայրենիքը` Ձեր իմաստուն ղեկավարությամբ, ավելի հզորանա: Մեկ անգամ եւս այս մտածումներով եւ սպասումներով ողջունում եմ Ձեզ»:

ՀՀ վարչապետի պաշտոնակատար Նիկոլ Փաշինյանը նշել է. «Շնորհակալ եմ, Վեհափառ տեր: Անկեղծ ասած, շատ տպավորիչ այցելություն ստացվեց: Ես ուզում եմ նախեւառաջ եւս մեկ անգամ շնորհավորել Ձեզ` Ձեր հոգեւոր գործունեության 50-ամյակի կապակցությամբ: Ես իմ գնահատանքի խոսքերն արտահայտեցի առավոտյան տեղի ունեցած միջոցառման ժամանակ: Ցանկանում եմ վերահաստատել իմ մեծ հարգանքով պատկառանքը եւ գնահատանքը Ձեզ եւ Ձեր գործունեությանը եւ շնորհակալություն հայտնել հրավերի համար, որովհետեւ այս հրավերը հնարավորություն տվեց, որ լիբանանահայության բոլոր շերտերի հետ շփվելու, ծանոթանալու առիթ ունենամ: Իհարկե, մեծապես հաճելի էր արձանագրել, որ Հայաստանի կառավարությունն ունի մեր հայրենակիցների լիակատար աջակցությունը: Հավատացեք, դա մեզ մեծ ուժ է տալիս, եւ առավել եւս Ձեր խոսքը, Ձեր դիրքորոշումը, որ Դուք արտահայտել եք հենց թավշյա հեղափոխության, փոփոխությունների օրերին, ինչի համար ուզում եմ Ձեզ շնորհակալություն հայտնել:

Ցանկանում եմ ասել, որ այդ փոփոխությունները չէին կարող տեղի ունենալ առանց Սփյուռքի միանշանակ աջակցության, եւ նաեւ Սփյուռքի եւ հայության միանշանակ աջակցությունն էր այն գործոններից մեկը, որ հնարավորություն տվեց քաղաքական գործընթացներն իրականացնել բացառապես խաղաղ, սիրո եւ համերաշխության մթնոլորտում, որովհետեւ այնքան ակնհայտ էր հայության դիրքորոշումը ոչ միայն Հայաստանում, այլեւ Սփյուռքում, որ պարզապես որեւէ դիմադրություն անիմաստ էր դառնում:

Իհարկե, շատ կարեւոր է ապագայի մասին խոսելը, եւ գտնվելով հայության այսպիսի հոգեւոր կենտրոնում` ես ցանկանում եմ ապագայի մասին խոսելիս շեշտել հավատի գործոնը: Մենք պետք է հավատանք մեզ, մեր ժողովրդի ապագային, մեր ուժերին, եւ դա թերեւս ամենակարեւորն է: Եթե կա հավատ, համոզմունք եւ նպատակ, այդ նպատակը հասանելի է, որովհետեւ, ինչպես Աստվածաշնչում` Նոր կտակարանում է ասվում, եթե մանանեխի չափ հավատ ունենաս, լեռներ կարելի է շարժել:

Հայաստանում տեղի ունեցածը եւս մեկ անգամ ապացուցեց հետեւողականության սկզբունքի, հավատքի ուժը, որովհետեւ ժողովուրդն, ի վերջո, հավատաց ինքն իրեն, եւ այդ հավատն էր, որ առաջ մղեց մեզ եւ բերեց հաղթանակի: Ես հույս ունեմ եւ համոզված եմ նաեւ, որ մեր ժողովուրդը հավատն իր ուժերի նկատմամբ չի կորցնի, որովհետեւ շատ կարեւոր է արձանագրել` ինչն է էական: Էականն այն չէ, որ այս անձի փոխարեն մյուս անձը դարձավ վարչապետ կամ նախարար կամ որեւէ այլ պաշտոնյա: Էական փոփոխությունն այն է, որ ժողորդի ձայնը դարձավ վճռական իշխանության ձեւավորման գործում, ինչպես եւ նախատեսված է մեր երկրի Սահմանադրությամբ, եւ որեւէ կասկած չկա, որ այդպես էլ պետք է շարունակվի: Պետք է հուսանք, որ մեր գործերով, մեր գործունեությամբ ոչ միայն չենք հիասթափեցնի մեր ժողովրդին, այլեւ նրան նոր շունչ, նոր հավատ կներշնչենք սեփական ուժերի նկատմամբ: Իհարկե, այս գործում շատ կարեւոր է Ձեր աջակցությունը եւ շնորհակալ եմ Ձեր պատրաստակամության համար»:


https://news.am/arm/news/477031.html

İlk yorum yapan siz olun

Bir Cevap Yazın

%d blogcu bunu beğendi: