ԱՂԹԱՄԱՐԻ ՍՈՒՐԲ ԽԱՉ ԵԿԵՂԵՑԻՆ ՀԱՒԱՆԱԲԱՐ ԸՆԴԳՐԿՈՒԻ «ԻՒՆԵՍՔՕ»Ի ՄՇՏԱԿԱՆ ՑԱՆԿԻՆ ՄԷՋ

Վանայ լիճի Աղթամար կղզիին վրայ գտնուող հայկական Սուրբ Խաչ եկեղեցին հաւանաբար ընդգրկուի «ԻՒՆԵՍՔՕ»ի Համաշխարհային ժառանգութեան մշտական ցանկին մէջ:

Թրքական «Անատոլու» կայքը յօդուած մը հրապարակած է Աղթամարի մասին` դետել տալով, որ  տարեկան հազարաւոր տեղացի եւ օտար զբօսաշրջիկներ կ՛այցելեն կղզի: Այս տարուան առաջին 7 ամսուան ընթացքին Աղթամար այցելած է տեղացի եւ արտասահմանցի 83.000 զբօսաշրջիկ:

Վանի մշակոյթի եւ զբօսաշրջութեան հարցերու տնօրէն Մուզաֆեր Աքթուղ ըսած է, որ Աղթմարի յուշահամալիրը զբօսաշրջութեան տեսանկիւնէ քաղաքի ամենակարեւոր պատմական արժէքներէն մէկն է: Ան ըսած է, որ Թանգարաններու Գլխաւոր Վարչութեան հետ այս հարցը քննարկելէ ետք որոշած են այս տարի յայտ ներկայացնել «ԻՒՆԵՍՔՕ»ին` Աղթամարի Սուրբ Խաչ եկեղեցին Համաշխարհային ժառանգութեան մշտական ցանկին մէջ ընդգրկելու համար:

Յօդուածին մէջ կը նշուի, որ Աղթամար եկեղեցին կառուցուած է 915-921 թուականներուն Գագիկ Ա. թագաւորին հրամանով, ճարտարապետը Մանուէլն է:

2005-ին Թուրքիոյ մշակոյթի եւ զբօսաշրջութեան նախարարութեան որոշումով սկսած են եկեղեցւոյ վերանորոգման աշխատանքները: Աշխատանքները տեւած են երկու տարի: Ծախսուած է 4 միլիոն թրքական լիրա:

Կը յիշուի, որ վերականգնողական աշխատանքներուն մէջ, մասնագէտ-արուեստագէտներէ բացի, ընդգրկուած էին նաեւ հնագէտներ եւ ճարտարապետ-շինարարներ, որոնց մէջ` նաեւ Հայաստանէն:

Վերանորոգումէն ետք եկեղեցին ստացած է թանգարան-յուշարձանի կարգավիճակ:

Աւելցնենք, որ 9 Սեպտեմբեր 2010-ին, 95 տարուան ընդմիջումէ ետք, եկեղեցւոյ մէջ տեղի ունեցաւ պատարագ, իսկ 30 Սեպտեմբերի գիշերը մինչեւ 1 Հոկտեմբեր եկեղեցւոյ վրայ դրուեցաւ խաչ մը: Մինչ այդ թրքական կառավարութիւնը հրաժարած էր խաչ տեղադրելէ եկեղեցւոյ գմբէթին վրայ, որուն պատճառով ողջ աշխարհի հայութիւնը բողոքի ցոյց կազմակերպած էր, կը գրէ «Փանորամա»ն:

http://www.kantsasar.com/news/2018/08/13/36131/