ԷՐՎԱՊ երէկ երեկոյեան, Ս. Փրկիչ Ազգային Հիւանդանոցի «Կոմիտաս» սրահին մէջ գումարեց աշնանային եղանակի իր անդրանիկ ժողովը՝ Պետրոս Շիրինօղլուի նախագահութեան ներքեւ։
Օրակարգի վրայ ընդգրկուած էին հետեւեալ հարցերը.
– 6 Մայիս 2024 թուակիր վերջին ժողովի արձանագրութեան ընթերցում եւ քուէարկութիւն։
– ԷՐՎԱՊի նախագահ եւ Ս. Փրկիչ Ազգ. Հիւանդանոցի Հոգաբարձութեան Ատենապետ Պետրոս Շիրինօղլուի բացման խօսքը։
– Խասգիւղի (Հասքէօյ) գերեզմանատան վարչութեան տեղեկագիրը։
– Կրթական յանձնախումբի գործունէութեան մասին զեկուցում։
– Կրօնքի դասերու ուսումնական ծրագրի համար պիւտճէ։
– Յուղարկաւորութիւններու ընթացքին կատարուած նուիրատուութիւններու նոր համակարգի մասին քննարկում։
– Առաջարկներ։
Տրուած ըլլալով որ ժողովը փակ էր մամուլին, չենք կրնար սպառիչ լուրեր հաղորդել մեր ընթերցողներուն։ Մեր ստացած տեղեկութիւններու համաձայն, Կրթական յանձնախումբի անունով Պէյօղլուի եկեղեցեաց Թաղային Խորհուրդի անդամ Սեւան Կարապետեան ներկայացուցած է իրենց գործունէութիւնը եւ կրթական մարզի ընդհանուր պատկերը։ Խասգիւղի Ս. Ստեփանոս եկեղեցւոյ Թաղային Խորհուրդի Ատենապետ Սեւան Չաւուշեան ներկայացուցած է եկեղեցապատկան կալուածները ետ ստանալու հարցով դատական գործընթացները։ Յուղարկաւորութիւններու ընթացքին նուիրատուութիւններու նոր համակարգ մը հաստատելու հարցով որեւէ լուծում չէ գտնուած տակաւին, տնտեսական յանձնախումբը գործի լծուած է այս ուղղութեամբ։
ԷՐՎԱՊի ատենադպիր Լեւոն Գուզիքօղլու նախապէս ըսած էր որ Պր. Պետրոս Շիրինօղլու ժողովէն քանի մը օր յետոյ յայտարարութիւններ պիտի ընէ մամուլին։
İlk yorum yapan siz olun