ՀԱՆՐԱՊԵՏՈՒԹԵԱՆ ՏՕՆԻ ՇՆՈՐՀԱՒՈՐՈՒԹԵԱՆՑ ՄԱՍՆԱԿՑԵՑԱՒ ԱՄԵՆ. Ս. ՊԱՏՐԻԱՐՔ ՀԱՅՐԸ

Ն.Ա.Տ. Սահակ Բ. Պատրիարք Հայրը, 29 Հոկտեմբեր 2024, Երեքշաբթի, ներկայ եղաւ Թուրքիոյ Հանրապետութեան տօնի առթիւ սարքուած ընդունելութեանց: Նորին Ամենապատուութեան կ’ընկերանար գաւազանակիր Հոգշ. Տ. Գասպար Աբղ. Կարապետեան:

Նոյն առաւօտ, Ստանպուլի Կուսակալութեան մէջ տեղի ունեցաւ պաշտօնական շնորհաւորութիւն, որու ընթացքին Նորին Ամենապատուութիւնը անգամ մը եւս անձամբ շնորհաւորեց Ստանպուլի Կուսակալ Տաւութ Կիւլը եւ իր ու Հայ համայնքի անունով բարեմաղթութիւններ ըրաւ:

Մեր Հոգեւոր Պետը միջօրէին օդային ճամբով մեկնեցաւ Անգարա եւ երեկոյեան Պէշթէփէյի Նախագահական համալիրին մէջ մասնակցեցաւ Թուրքիոյ Հանրապետութեան Նախագահ Վսեմ. Ռեճեփ Թայյիփ Էրտօղանի սարքած ընդունելութեան:

Հանդիսութեան ընթացքին փոքր համերգ մը սարքուեցաւ: Հանրապետութեան Նախագահը արտասանեց իր ուղերձը:

Նորին Ամենապատուութիւնը այստեղ անձամբ շնորհաւորեց Հանրապետութեան Վսեմաշուք Նախագահը եւ պետական աւագանին ու իր եւ Հայ համայնքի անունով բարեմաղթութիւններ ըրաւ:

Ընդունելութեան մասնակցեցան պետական աւագանին, դիւանագիտական շրջանակներ, հոգեւոր պետեր, համայնքներու ներկայացուցիչներ: Մեր համայնքէն ներկայ էին Հայ Վաքըֆներու Միութեան (ԷՐՎԱՊ) Նախագահ եւ Ս. Փրկիչ Ազգ. Հիւանդանոցի Հոգաբարձութեան Ատենապետ Պետրոս Շիրինօղլու, Պէյօղլուի Ս. Եկեղեցեաց Թաղային Խորհուրդի Ատենապետ Աքսէլ Թօփալեան, Ֆերիգիւղի Ս. Վարդանանց Եկեղեցւոյ Թաղային Խորհուրդի Ատենապետ Մուրատ Էօղէր, Օրթագիւղի Ս. Աստուածածին Եկեղեցւոյ Թաղային Խորհուրդի Ատենապետ Սարգիս Չեթինքայա, Շէյտա Երկանեան-Նանեան, Թարգմանչաց Վարժարանի Տնօրէն Տիրուհի Պէրրին, Ալէն Թէքպըչաք, ինչպէս նաեւ երեսփոխան Տքթ. Սեւան Սվաճըօղլու:

Նորին Ամենապատուութիւն այսօր կը վերադառնայ Աթոռ:

Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad