ՀՈՎՈՒԱԿԱՆ ԱՅՑ ԷԼԱԶԸՂԻ ՄԵՐ ԺՈՂՈՎՈՒՐԴԻՆ

Ն.Ա.Տ. Սահակ Բ. Պատրիարք Հօր հրամանաւ եւ օրհնութեամբ, Հաթայի եկեղեցեաց հոգեւոր հովիւ եւ գաւառի տեսուչ Արժ. Տ. Աւետիս Քհնյ. Թապաշեան, 29 Սեպտեմբեր 2024, Կիրակի առաւօտ, մեկնեցաւ Էլազըղ:

Տէր Հայրը Գերեզմանատան Ս. Նշան մատրան մէջ Խաչվերացի տաղաւարի Ս. Պատարագ մատոյց, որու ընթացքին քարոզեց նիւթ ունենալով Տէր Յիսուս Քրիստոսի խաչը: Ան ըսաւ, որ խաչը լոկ խորհրդանիշ մը չէ, այլ՝ Տէր Յիսուս Քրիստոսի կեանքին արտացոլացումը: Խաչը ունի սիրոյ եւ խոնարհութեան զոյգ իմաստներ եւս: Ս. Սեղանին սպասարկեց Արման Եաղճը: Արարողութեան մասնակցեցան տեղւոյն փոքրաթիւ հայ համայնքի անդամները:

Յաւարտ Ս. Պատարագի՝ խաչը զարդարող ռեհանները ժողովուրդին բաժնուեցան:

Այցելութիւն տրուեցաւ գերեզմանատան շիրիմներուն եւ կատարուեցաւ հոգեհանգստեան պաշտօն:

Տէր Հայրը զրուցեց տեղւոյն մերազն ժողովուրդի անդամներուն հետ:

Էլազըղի մեր ժողովուրդը Տէր Հօր անձին մէջ շնորհակալութիւն յայտնեց Ամեն. Ս. Պատրիարք Հօր, որ բարի եղած է ուղարկել Տէր Հայրը, որ Ս. Պատարագ մատուցելով ու քարոզելով մխիթարած է մեր հաւատացեալ ժողովուրդը:

Տէր Հայրը նոյն օր Էլազըղ մնալէ ետք, յաջորդ առաւօտ վերադարձաւ Հաթայ:

Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad