Գերապայծառ Հայր Գէորգ Թ.Ծ.Վ. Նորատունկեանը՝ Հայաստանի, Վրաստանի, Ռուսաստանի եւ Արեւելեան Եւրոպայի Կաթողիկէ Հայոց առաջնորդ անուանեց

Ֆրանչիսկոս Սրբազան Քահանայապետը՝ Գերապայծառ Հայր Գէորգ Թ.Ծ.Վ. Նորատունկեանը՝ Հայաստանի, Վրաստանի, Ռուսաստանի եւ Արեւելեան Եւրոպայի Կաթողիկէ Հայոց առաջնորդ անուանեց։

ԿԵՆՍԱԳՐԱԿԱՆ ՏՈՒԵԱԼՆԵՐ ՆՈՐ ԱՆՈՒԱՆԵԱԼ ԱՐՔԵՊԻՍԿՈՊՈՍԻՆ՝

ԳԵՐՊԾՌ. Հ. ԳԷՈՐԳ Թ.Ծ.Վ. ՆՈՐԱՏՈՒՆԿԵԱՆԻ

Ծնած է 1968-ին, Հալէպ – Սուրիա:

1984-ին, 16 տարեկանին, կը մեկնի Լիբանան, Զմմառ, իբր հետամուտ Զմմառու Պատրիարքական Կղերի Միաբանութեան՝ «Տիրամօր Վերափոխում» վանքին մէջ շարունակելու համար իր բարձրակարգ ուսումը:

1987-ին, կը տեղափոխուի Հռոմ՝ իր իմաստասիրական ու աստուածաբանական ուսումները կատարելու։

1990-ին, աւարտելով կը ստանայ՝ իմաստասիրական պաքալորիան՝ Տոմինիկեան Հայրերու «Սուրբ Թովմաս Աքուինացի» համալսարանէն:

1993-ին, կը ստանայ աստուածաբանական պաքալորիան՝ Յիսուսեան Հայրերու Գրիգորեան համալսարանէն, Հռոմ:

1995-ին, Հալէպի մէջ կը ձեռնադրուի կուսակրօն քահանայ իբր անդամ Զմմառու Պատրիարքական Կղերի Միաբանութեան:

Իր մասնագիտութիւնն է դաստիարակաբանութիւնը («Science de l’éducation»), որուն վկայականը 1997-ին ձեռք կը ձգէ Հռոմի Սալեզեան Հայրերու համալսարանէն:

Ունի երկու համալսարանական վկայականներ՝ նուիրեալ կեանքին կոչումներու կազմաւորման մէջ (Հռոմ, 2012) եւ Սուրբերու Դատի ժողովին մէջ իբր հայցարկու։

Կը տիրապետէ՝ Հայերէնի, Արաբերէնի, Իտալերէնի, ֆրանսերէնի եւ հմուտ է՝ Ռուսերէնի եւ Անգլերէնի։

Իր քահանայական ձեռնադրութենէն եւ համալսարանական ուսումին աւարտումէն ետք՝ Հ. Գէորգ վարեց զանազան պաշտօններ ու ստանձնեց տարբեր պատասխանատուութիւններ:

– Դպրեվանքի տեսուչ, փոխ ժողովրդապետ (Զմմառ, Հալէպ, Զմմառ, 1997-2000):

– Իր Միաբանութեան դպրեվանքին տեսուչ եւ ընդհանուր մատակարար, Անարատ Յղութեան Քոյրերուն երկրորդական վարժարանին ուսուցիչ (Զմմառ, Պէյրութ, 2001-2007):

– Մոսկուայի Հայ Կաթողիկէ Համայնքին ժողովրդապետ (2007-2010):

– Քահանայապետական Հայ Լեւոնեան Վարժարանին մեծաւոր եւ Վատիկանի մօտ Հայ Կաթողիկէ Եկեղեցիին Պատրիարքական փոխանորդ (Հռոմ, 2010-2015):

– Առաքելական Կառավարիչ Ս. Երկրի եւ Յորդանանի Կաթողիկէ Հայոց (2013-2015):

– Փոխ-հայցարկու Սուրբ Գրիգոր Նարեկացիին «Եկեղեցւոյ Վարդապետ» հռչակումին համար դատական յանձնախումբին մէջ:

⁃ Լիոնի Նարեկի Տիրամօր ժողովրդապետութեան՝ ժողովրդապետ 2015 – 2024։

⁃ Ներկայիս՝ փոխ-հայցարկու «Մարթա Շամբոն»ի սրբադասումին համար դատական յանձնախումբին մէջ:

⁃ 2023-ի 18 Օգոստոսին, Զմմառու Պատրիարքական Կղերին Միաբանութեան Փոխանորդ եւ Վանքին Մեծաւոր (Զմմառ):

⁃ 19 Օգոստոս 2024-ին, Հայաստանի, Վրաստանի, Ռուսաստանի եւ Արեւելեան Եւրոպայի Կաթողիկէ Հայոց առաջնորդ կ՛անուանուի Ֆրանչիսկոս Սրբազան Քահանայապետի կողմէն։

Նորանշանակ Արքեպիսկոպոսը՝ իր նշանակման անդրանիկ Սուրբ եւ Անմահ Պատարագը պիտի մատուցանէ Զմմառու Վանքի «Փոխման Սրբոյ Կուսին» Մայր Եկեղեցւոյ մէջ՝ Կիրակի, 25 Օգոստոս 2024-ի, առաւօտեան ժամը 10:30-ին, ապա Մայրավանքի դահլիճին մէջ՝ նորանշանակ Արքեպիկոպոսը պիտի ընդունի հաւատացեալներու շնորհաւորանքները։

https://www.facebook.com/photo?fbid=836923671975986&set=a.557283489940007