ՀՈՎՈՒԱՊԵՏԱԿԱՆ ԱՅՑ ԴԷՊԻ ԿՐԵՏԷ

Ն.Ա.Տ. Սահակ Բ. Պատրիարք Հայրը 17 Յունիս 2024, Երկուշաբթի, յետ միջօրէին հովուապետական այցելութեամբ մեկնեցաւ Կրետէ Կղզի: Ինչպէս ծանօթ է, Կրետէ Կղզիի Հայ համայնքը ենթակայ է Պոլսոյ Պատրիարքական Աթոռոյ հոգեւոր իշխանութեան: Այս այցելութեան ընթացքին Նորին Ամենապատուութեան կ’ընկերնանան գաւազանակիր Հոգշ. Տ. Գասպար Աբղ. Կարապետեան եւ Արժ. Տ. Տրդատ Աւ. Քհնյ. Ուզունեան:

Մեր Հոգեւոր Պետը, ընդառաջելով Կրետէի Հայոց Հոգեւոր Տեսուչ Գերշ. Տ. Եզնիկ Արքեպս. Պետրոսեանի հրաւէրին, Աթէնքի ճամբով մեկնեցաւ Կրետէ:

Պատրիարք Հայրը նոյն գիշեր՝ ժամը 21.30-ին հասաւ Կրետէի Իրաքլիոն քաղաքի օդակայանը: Այստեղ դիմաւորելու եւ բարի գալուստ մաղթելու եկած էին Կրետէյի Եւկինիոս Բ. Արքեպս.ը, Կրետէի Հայոց Հոգեւոր Տեսուչ Գերշ. Տ. Եզնիկ Արքեպս. Պետրոսեան, Յունահայոց Թեմի Առաջնորդական Տեղապահ Հոգշ. Տ. Խորէն Վրդ. Առաքելեան, Կրետէյի Փոխ նախագահապետը, Յունաստանի Հայ Աւետարանական Եկեղեցւոյ համայնքապետ Վիգէն Չոլաքեան, ինչպէս նաեւ Կրետէյի Հայոց Ս. Կարապետ Եկեղեցւոյ Ծխական Խորհուրդի անդամները:

Նորին Ամենապատուութիւնը առաջնորդուեցաւ հիւրանոց, ուր ընթրիքի սեղան սարքուեցաւ:

Մեր Հոգեւոր Պետը իր դէպի Կրետէ հովուապետական անդրանիկ այցելութեան ընթացքին զանազան շփումներ պիտի ունենայ եւ պիտի մէկտեղուի այստեղի մերազն ժողովուրդի հետ: Նորին Ամենապատուութիւնը յառաջիկայ շաբաթ պիտի վերադառնայ Աթոռ:

Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad