ԳԱԼՖԱԵԱՆ ՎԱՐԺԱՐԱՆԻ ՍԱՆԵՐՈՒ ԱՄԱՆՈՐԵԱՅ ՀԱՆԴԷՍԸ

Գալֆաեան վարժարանի սաներու Ամանորեայ հանդէսը սարքուեցաւ 27 Դեկտեմբեր Չորեքշաբթի, թաղին Սանուց միութեան սրահին մէջ։ Հանդէսին ներկայ էին Ս. Կարապետ եկեղեցւոյ հոգեւոր հովիւ Արժ. Տ. Պետրոս Քհնյ. Պուլտուքեան, Գուզկունճուքի եկեղեցւոյ Թաղային Խորհուրդի Ատենապետ Պրն. Մասիս Գույումճու, վարժարանի երկարամեայ բարերարուհիներէն Տիկին Մարգրիտ Աթմաճա, Գալֆաեան Տան Խնամակալութեան ատենապետ Ալֆրէտ Սունա ու գործակից ընկերները եւ ծնողներ։

Հանդէսի խօսնակն էր Լիէնա Կիւլ։ Յայտագրի սկիզբը ան նախ բեմ հրաւիրեց տնօրէնուհի Թամար Ներկիսը, որ շնորհակալութիւն յայտնեց բոլոր ներկաներուն, նաեւ ուսուցիչներուն ու աշակերտներուն, որոնք ժրաջան աշխատութեամբ պատրաստուած էին օրուայ հանդէսին։

Աշակերտները բեմ ելան Նոր Տարին եւ Ս. Ծնունդը խորհրդանշող ներկայացումով մը։ Անոնք հեքեաթային հերոսներու կերպարներով փնտռեցին Նոր տարուայ շունչը։ Յայտագիրը ամբողջացաւ պարերով ու հեշտալուր երաժշտութեամբ։ Այս «հեքիաթային պտոյտ»ը արժանացաւ բոլոր ներկաներու գնահատանքին։

Ապա մանկապարտէզի փոքրիկները ներկայացուցին պար մը, որ ցոյց կուտար իրենց բեմական յատկութիւնները։

Հանդէսի աւարտին թաղի հոգեւոր հովիւը իր գնահատական խօսակցութեամբ շնորհաւորեց Գալֆաեան վարժարանի կրթական մշակներն ու սաները։ Այնուհետեւ աշակերտները միասնաբար կտրեցին Ամանորեայ համեղ կարկանդակը։

Իսկ Ուրբաթ, 29 Դեկտեմբերին, Մխիթարեան Սանուց Միութեան «500 զոյգ ժպտուն աչքեր» ծրագրով գալֆաեանցի աշակերտներուն հասան իրենց Ամանորեայ նուէրները։

https://www.normarmara.com/arsiv2024-1/020124.html