Յունաց Ն.Ս.Տ.Տ. Բարթոլոմէոս Ծայրագոյն Պատրիարքը 30 Նոյեմբեր 2023, Հինգշաբթի առաւօտ, Ս. Անդրէասի Տօնին առթիւ Ֆէնէրի Ս. Գէորգ Աթոռանիստ Մայր Տաճարի մէջ Ս. Պատարագ մատոյց, առընթերակայութեամբ բազմաթիւ մետրոպոլիտներու։ Այս տօնը ընդունուած է, որպէս Յունաց Պատրիարքութեան տարեդարձը:
Նոյն առթիւ, ըստ ընկալեալ սովորութեան, յանուն Հռոմի Ն.Ս.Տ.Տ. Ֆրանչիսկոս Սրբազան Քահանայապետի, արարողութեանց մասնակցելու համար քաղաքս ժամանած էր պատուիրակութիւն մը, գլխաւորութեամբ Քրիստոնէից Միութեան Քահանայապետական Խորհուրդի Նախագահ՝ Կարտինալ Քուրթ Քօհի։
Ս. Անդրէասի տօնին յանուն Ն.Ա.Տ. Սահակ Բ. Պատրիարք Հօր մասնակցեցան Հոգշ. Տ. Յարութիւն Վրդ. Տամատեան եւ Բրկ. Կարապետ Կ.Սրկ. Եոնթան: Արարողութեան մասնակցեցան նաեւ քոյր եկեղեցիներէ հոգեւոր առաջնորդներ:
Արարողութեան աւարտին, Յարութիւն Վարդապետ, Նորին Սրբութեան անձին մէջ շնորհաւորեց Աթոռոյ տարեդարձը եւ հաղորդեց մեր Հոգեւոր Պետին արեւշատութեան մաղթանքներն ու եղբայրական ողջոյնները։ Բարթոլոմէոս Պատրիարք շնորհակալութիւն յայտնեց արարողութեանց մասնակցութեան եւ Նորին Ամենապատուութեան յղած բարեմաղթանքներուն համար։
Ս. Պատարագէ ետք Նորին Սրբութիւնը ճաշարանի մը մէջ հիւրասիրեց հիւրերը:
Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad
İlk yorum yapan siz olun