ՊԱՏՐԻԱՐՔԱՐԱՆԻ ՏՆՏԵՍԱԿԱՆ ՅԱՆՁՆԱԽՈՒՄԲԻ ՀԱՒԱՔԸ

Ն.Ա.Տ. Սահակ Բ. Պատրիարք Հայրը 30 Նոյեմբեր 2023, Հինգշաբթի երեկոյեան, ընդունեց Պատրիարքական Աթոռոյս տնտեսական յանձնախումբի անդամները։

Նորին Ամենապատուութիւնը նախ բարի գալուստ մաղթեց նոր անդամներով ճոխացած յանձնախումբին եւ շնորհակալութիւն յայտնեց Աթոռոյս համար իրենց եղած հրաւէրին ցուցաբերած պատրաստակամութեան համար։

Ժողովի ընթացքին, նոր տարիի սեմին, քննուեցան Աթոռոյս հաշիւներն ու ելեւմտական վիճակը եւ կարծիքի փոխանակում կատարուեցաւ այս մասին։

Աթոռոյս տնտեսական յանձնախումբը նոր անդամներու եւս յաւելումով ստացաւ հետեւեալ վիճակը. Վարդավառ Ճավաք, Տիգրան Տիւլկէրեան, Կարպիս Կէօքտաղ, Արման Չիչէքօղլու, Պերճ Չուպուքճեան, Արեգ Ֆէրահեան։ Ժողովին մաս կազմեցին նաեւ Հաշուակալական գրասենեակի տեսուչ Արժ. Տ. Շիրվան Քհնյ. Միւրզեան, Աթոռոյս պատուակալ հաշուակալ Պօղոս Եազըճեան եւ Պատրիարքարանի հաշուապահ Մարթա Ժոսլին Տինչքայըքճեան։

Ժողովի աւարտին մեր Հոգեւոր Պետը օրհնեց յանձնախումբի անդամները եւ կարողութիւն մաղթեց իրենց։

http://Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad