ՊԱՏՐԻԱՐՔ ՀՕՐ ԱՅՑԵԼՈՒԹԻՒՆԸ ՍՏԱՆՊՈՒԼԻ ԿՈՒՍԱԿԱԼԻՆ

Ն.Ա.Տ. Սահակ Բ. Պատրիարք Հայրը 16 Հոկտեմբեր 2023, Երկուշաբթի, ժամը 18.00-ին, այցելեց Ստանպուլի Կուսակալ Տավուտ Կիւլի։ Նորին Ամենապատուութեան կ՚ընկերանային Պատրիարքական Փոխանորդ Արժ. Տ. Գրիգոր Աւ. Քհնյ. Տամատեան եւ Ս. Աստուածածին Աթոռանիստ Մայր Եկեղեցւոյ Թաղային Խորհուրդի Ատենապետ՝ Հրանդ Մոսկոֆեան։

Մեծայարգ Կուսակալը պաշտօնի կոչուած էր այս տարուան 5 Յունիսին։ Նորին Ամենապատուութիւնը, շնորհաւորեց Մեծայարգ Կուսակալը իր պաշտօնի ձեռնարկման առթիւ եւ յաջողութիւն մաղթեց։

Մեծայարգ Կուսակալը շնորհակալութիւն յայտնեց սոյն քաղաքավարական այցելութեան համար եւ հետաքրքրուեցաւ քաղաքի Հայ համայնքի վիճակով։ Մեր Հոգեւոր Պետը ընդհանուր տեղեկութիւններ փոխանցեց համայնքի կրօնական, կրթական, բարեսիրական եւ մշակութային կեանքի մասին։

Նորին Ամենապատուութիւնը շնորհակալութիւն յայտնեց ընծայուած ընդունելութեան համար եւ Մեծայարգ Կուսակալին նուիրեց փայտեայ գեղեցիկ պտղաման մը, ի յիշատակ սոյն այցելութեան։

Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad