Շիշլի մարզակումբի վարչութեան ատենապետ Ալէն Թեքպըչաք եւ գործակից ընկերները երէկ ընդունուեցան Թուրքիոյ ֆութպոլի դաշնակցութեան նախագահ Մեհմէտ Պիւյիւքէքշիի կողմէ։ Հարկ է նշել, որ Շիշլի վերջին երկու եղանակներուն ախոյեան աւարտած է Թուրքիոյ ֆութսալի լիկը։ Ինչպէս այցեալ տարի, այս տարի եւս Շիշլիի խումբը Թուրքիան պիտի ներկայացնէ՝ ՈՒԷՖԱ-ի ֆութսալի ախոյեաններու լիկին մէջ։ Զրոյցի ընթացքին շիշլիցիները Մեհմէտ Պիւյիւքէքշիի հետ բաժնեցին այս պատուաբեր յաջողութեան առթած զգացումները։ Անոնք ամփոփ տեղեկութիւններ տուին նաեւ Շիշլի մարզակումբի ընդհանուր գործունէութեան շուրջ։ Այս ամբողջին մէջ մասնաւորապէս շեշտուեցաւ, որ ակումբը որդեգրած է ֆութսալը խրախուսելու սկզբունքը։ Իր կարգին, Պիւյիւքէքշին ալ յաջողութիւն մաղթեց շիշլիցիներուն եւ խոստացաւ հնարաւոր աջակցութիւնը ցուցաբերել։
Հուսկ, Ալէն Թեքպըչաք Մեհմէտ Պիւյիւքէքշիին յանձնեց յուշանուէր մը եւ Շիշլիի մարզաշապիկ մը։
İlk yorum yapan siz olun