Ն.Ա.Տ.Սահակ Բ. Պատրիարք Հայրը 20 Յուլիս 2023, Ուրբաթ, ժամը 11.00-ին ընդունեց Գուրուչէշմէի Երեւման Ս. Խաչ Եկեղեցւոյ Թաղային Խորհուրդի Ատենապետ՝ Լեւոն Քուզիքօղլուն, որ Թրքահայ Վաքըֆներու Միութեան՝ ԷՐՎԱՊ-ի վերջին ժողովին հրաւիրուած էր ատենադպրութեան պաշտօնին։
Լեւոն Քուզիքօղլու նախ շնորհակալութիւն յայտնեց Նորին Ամենապատուութեան, ընծայուած ընդունելութեան համար, ապա յայտնեց, թէ ինք սիրով յանձն առած էր ձեռնարկել նոր քարտուղարութեան մը կազմութեան աշխատանքին, նաեւ տեղեկութիւն տուաւ, թէ ԷՐՎԱՊ-ի շրջագիծէն ներս պիտի կազմուէին յանձնախումբեր։
Նորին Ամենապատուութիւնը շնորհաւորեց Լեւոն Քուզիքօղլուն եւ խրախուսեց զինքը։ Թելադրեց, որ առաջնահերթութիւնը տրուի կրթական յանձնախումբի կազմութեան, որպէսզի վարժարաններու հետ առընչուած հարցերը ձեռք առնուին ԷՐՎԱՊ-ի սեղանին վրայ եւ լուծման միջոցներ որոնուին։
Ընդունելութեան աւարտին մեր Հոգեւոր Պետը, իր հայրական օրհնութիւնը տուաւ եւ յայտնեց, թէ կը մնար աղօթող Լեւոն Քուզիքօղլուի աշխատութեանց յաջողութեան համար։
Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad
İlk yorum yapan siz olun