Ն.Ա.Տ. Սահակ Բ. Պատրիարք Հօր հրաւէրով, 22 Յունիս 2023, Հինգշաբթի, Պատրիարքարանի մէջ համայնքային վարժարաններու մասին խորհրդակցական ժողով մը գումարուեցաւ։
Նորին Ամենապատուութեան նախագահութեամբ կայացած հանդիպումին մասնակցեցան Պատրիարքական Փոխանորդ Արժ. Տ. Գրիգոր Աւ. Քհնյ. Տամատեան, Արժ. Տ. Տրդատ Աւ. Քհնյ. Ուզունեան, Արժ. Տ. Շիրվան Քհնյ. Միւրզեան, յանուն Հայ Կաթողիկէ Արքեպիսկոպոսարանի՝ Գերպ. Տ. Վարդան Ծ. Վրդ. Գազանճեան, Ստանպուլի երեսփոխան Տքթ. Սեւան Սվաճըօղլու, համայնքային վարժարաններ խնամող խնամակալութեանց եւ թաղային խորհուրդներու ատենապետներ կամ ներկայացուցիչներ եւ վարժարաններու հիմնադրի ներկայացուցիչներ։
Նիստը բացուեցաւ Տէրունական Աղօթքով։
Գաղափարներու եւ կարծիքներու փոխանակում կատարուեցաւ մեր համայնքային վարժարաններու կրօնագիտութեան եւ հայ լեզուի ուսուցիչներու վերապատրաստութեան եւ իրենց ուսման մակարդակի բարձրացման, միջվարժարանային համակարգման յանձնախումբի մը կարիքին ու կազմութեան, համայնքային վարժարաններու շէնքերու երկրաշարժի տոկունութեան քննութիւններու վերջին կարգավիճակին մասին։
Ներկաներ այս նիւթերու շուրջ իրենց գաղափարները յայտնեցին, որոնց աւարտին Պատրիարք Հայրը իր փակման խօսքին մէջ շնորհակալութիւն յայտնեց բոլոր ներկաներուն եւ գնահատեց իրենց տարած աշխատանքը։
Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad
İlk yorum yapan siz olun