Ն.Ա.Տ. Սահակ Բ. Պատրիարք Հայրը, 19 Յունիս 2023, Երկուշաբթի, ընդունեց Ենիգիւղի Ս. Աստուածածին Եկեղեցւոյ թաղային խորհուրդի անդամները, առաջնորդութեամբ Եկեղեցւոյ հոգեւոր հովիւ Գերպ. Տ. Զաքէոս Ծ. Վրդ. Օհանեանի եւ գլխաւորութեամբ ատենապետ Կարպիս Գալայճեանի։
Այցելուներ նախ շնորհակալութիւն յայտնեցին ընդունելութեան համար եւ ըսին թէ իրենց խնամքին յանձնուած եկեղեցին կը կարօտի նորոգութեան ու բարեզարդման։ Այս իսկ պատճառաւ եկած են մեր Հոգեւոր Պետին գաղափարը առնելու եւ կարծիքի փոխանակում ունենալու։
Նորին Ամենապատուութիւնը սիրով ընդունելէ ետք, տուաւ իր յորդորները։ Ան յատկապէս կարեւոր նկատեց անհրաժեշտ աշխատանքներու համար նորոգութեան յանձնախումբ մը կազմել եւ հոգեւոր հովուին, թաղային խորհուրդին ու նորակազմ յանձնախումբի համատեղ աշխատանքով յառաջիկայ աշնան սկսիլ բարեզարդման։
Ընդունելութեան աւարտին Նորին Ամենապատուութիւնը իր հայրական օրհնութիւնը տուաւ Թաղական Խորհուրդին, յաջողութիւն մաղթեց իրենց արուարձանային եւ գողտրիկ այս եկեղեցւոյ ի նպաստ գործունէութեանց մէջ։
Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad
İlk yorum yapan siz olun