Ն.Ա.Տ. Սահակ Բ. Պատրիարք Հայրը, 1 Յունիս 2023, Հինգշաբթի, Պատրիարքարանի պաշտօնարանին մէջ ընդունեց Պատրիարքական Աթոռոյ Ընկերային Օժանդակութեան Յանձնախումբի հովանաւորութեան ներքեւ գործող Երկրաշարժէ Աղէտեալներու Օժանդակութեան Ենթայանձնախումբի ներկայացուցիչները։
Այցելուներ մեր Հոգեւոր Պետին յայտնեցին թէ եկած էին զինքը հրաւիրելու յառաջիկայ 3 Յունիս, Շաբաթ միջօրէին ընդունելութեան մը, որ տեղի պիտի ունենար Փանկալթըի Մխիթարեան վարժարանի պարտէզին մէջ։ Ընդունելութիւնը կազմակերպուած էր աղիտալի երկրաշարժի յաջորդող օրերուն քաղաքիս մէջի ընկերային օժանդակութեան գործին աջակցող անհատներուն շնորհակալութիւն յայտնելու համար։ Անոնք յոյս յայտնեցին, թէ այս մէկտեղումը առիթ պիտի ըլլայ համայնքի զանազան խաւերէ անձերու առաւել մերձեցման եւ ի նպաստ աղիտահար ժողովուրդի զօրակցութեան։
Նորին Ամենապատուութիւնը շնորհաւորեց ներկաները իրենց ընկերային ու քրիստոնէավայել ընթացքին համար։ Հայրաբար քաջալերեց զանոնք, ապա իրենց ոյժ եւ կարողութիւն մաղթեց նման աշխատանքներու մէջ։ Մեր Հոգեւոր Պետը ըսաւ, թէ նախագահական երդման արարողութեան ներկայ ըլլալու համար հարկադրուած է Անգարա մեկնիլ, սակայն սրտովին եւ իր աղօթքներով բոլորին հետ պիտի ըլլայ։ Այցելութեան աւարտին, Պատրիարք Հայրը բոլորին տուաւ իր հայրական օրհնութիւնները։
Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad
İlk yorum yapan siz olun