ՇԻՆՈՒԹԵԱՆ ՅԱՆՁՆԱԽՈՒՄԲԸ ԺՈՂՈՎ ԳՈՒՄԱՐԵՑ

Ն.Ա.Տ Սահակ Բ. Պատրիարք Հօր հրաւէրով, երկրաշարժէ տուժած շրջաններու վերականգնման համար կազմուած շինութեան յանձնախումբը 17 Ապրիլ 2023, Երկուշաբթի երեկոյ ժողով գումարեց Պատրիարքարանի մէջ։

Նորին Ամենապատուութեան նախագահութեամբ կազմուած յանձնախումբը հաւաքուելով խորհրդակցեցաւ Մարաշ կեդրոնով 6 Փետրուար 2023ին պատահած երկրաշարժի ընթացքին մեծապէս վնասուած Հաթայ եւ Մալաթիա նահանգներու մէջ բնակող մերազն ժողովուրդի վերականգնման համար մշակելի ծրագիրներու մասին։ 

Ժողովը բացուեցաւ մեր Հոգեւոր Պետին խօսքով։

Յանձնախումբի անդամները նկատի ունենալով եկեղեցիներու ատենապետներու կողմէ ներկայացուած անհրաժեշտ կարիքներու ցուցակները, հարկաւոր աշխատանքներ տանելու ուղղութեամբ շարժման անցան։

Հետեւեալ նիւթերու շուրջ տեղի ունեցաւ խորհրդակցութիւն.

1. Մալաթիոյ համար Պատրիարքական Աթոռոյ եւ Ասորի Եկեղեցւոյ համագործակցութեամբ Prefabrik գիւղի ծրագրին պիւտճէին համար կատարելի մէկ միլիոն թ.լ. օժանդակութիւն։ Նոյն ծրագրի մէջ ընկալում Մալաթիոյ Ս. Երրորդութիւն Եկեղեցւոյ (Թաշխորան Մշակութային Կեդրոն) եւ գերեզմանատան քովի տարածութեան վրայ կատարելի աշխատանք։

2. Վաքըֆ եւ Զէյթունիյէ գիւղերու մերազն ժողովուրդի տուներու վնասները քննելու յանձնախումբի կազմութիւն եւ 21 Ապրիլին նոյն խումբի մէկտեղում՝ Վաքըֆգիւղի մեր ժողովուրդին հետ։

3. Գիւղի ժողովուրդի համար անհրաժեշտ ութ քոնթէյնըրներու Վաքըֆգիւղ առաքում 19 Ապրիլ, Չորեքշաբթի։

4. Նոյն գիւղի համար պահանջուած օժանդակութեամբ նուազ վնասուած բնակարաններու ստուգում եւ տեղական յանձնախումբի մը հետ համագործակցաբար արագ նորոգութեան աշխատանքներու ձեռնարկում։

5. Հայճար խումբի գործօն մասնակցութիւն։

6. Արտասահմանի հայրենակցական միութիւններէ նիւթական օժանդակութիւն ապահովելու համար ծրագրի մշակում,

7. Իսկենտէրունի ճարտարապետական կառոյցի եւ բնակարաններու վնասներու ստուգման համար տեղւոյն ծխական խորհուրդի ատենապետի հետ խորհրդակցութիւն եւ համագործակցութիւն։

Այս նիւթերը յղուեցան Նորին Ամենապատուութեան ուշադրութեան եւ օրհնութեան։

Ժողովի աւարտին որոշուեցաւ առաջնակարգութիւն տալ նուազ վնասուած բնակարաններու ստուգման ու նորոգութեան աշխատանքներուն։ 

Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad