Յանուն Ն.Ա.Տ. Սահակ Բ. Պատրիարք Հօր, Գերշ. Տ. Արամ Արքեպս. Աթէշեան եւ Հոգշ. Տ. Յովակիմ Աբղյ. Սերովբեան 18 Ապրիլ 2023, Երեքշաբթի, Ս. Զատկի առթիւ շնորհաւորական այցելութիւններ տուին Ասորի Ուղղափառ եւ Ասորի Կաթոլիկ եկեղեցիներու Պատրիարքական փոխանորդներուն։
Սրբազան Հայրն ու Հայր Սուրբը նախ այցելեցին Թարլապաշըի Ս. Աստուածածին Ասորի Ուղղափառ եկեղեցւոյ համալիրին մէջի սրահը, ուր յանուն Նորին Ամենապատուութեան շնորհաւորեցին Պատրիարքական փոխանորդ Գերշ. Մոր Ֆիլիւքսինոս Եուսուֆ Չէթին Մետրոպոլիտին անձին մէջ Ասորի ուղղափառ եկեղեցւոյ ու համայնքի Ս. Զատիկը։
Սրբազան Մետրոպոլիտը շնորհակալութիւն յայտնեց Նորին Ամենապատուութեան, որ իր ներկայացուցիչներու միջոցաւ ուրախակից եղած էր Ասորի Ուղղափառ քոյր եկեղեցւոյ Ս. Յարութեան տօնախմբութեան։
Սրբազան Հայրն ու Հայր Սուրբը ապա այցելեցին Կիւմիւշսույուի Ասորի Կաթոլիկ եկեղեցւոյ համալիրին մէջի սրահը, ուր եւս յանուն մեր Հոգեւոր Պետին շնորհաւորեցին Պատրիարքական փոխանորդ Մոնս. Օրհան Չանլը Քորեպս.ի անձին մէջ Ասորի կաթոլիկ եկեղեցւոյ ու համայնքի Ս. Զատիկը։
Մոնս. Չանլը եւս շնորհակալութիւն յայտնեց Նորին Ամենապատուութեան, որ իր ներկայացուցիչներու միջոցաւ ուրախակից եղած էր Ասորի կաթոլիկ եկեղեցւոյ Ս. Յարութեան տօնախմբութեան եւ արեւշատութիւն մաղթեց մեր Հոգեւոր Պետին։
Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad
İlk yorum yapan siz olun