ՊԱՏՐԻԱՐՔԱՐԱՆԻ ԱՆՁՆԱԿԱԶՄԻ Ս. ԶԱՏԿԻ ՀԱՒԱՔԸ

Ն.Ա.Տ. Սահակ Բ. Պատրիարք Հայրը, 12 Ապրիլ 2023, Չորեքշաբթի, յետ միջօրէին, ընդունեց Պատրիարքարանի անձնակազմը։

Նորին Ամենապատուութիւնը իր ուրախութիւնը յայտնեց, որ Ս. Զատկի այս օրերուն առիթը կը ներկայանայ Պատրիարքարանի անձնակազմին հետ մէկտեղուելու։ Հակառակ այլեւայլ խոչնդոտներու, անձնակազմը կը շարունակէ իր պաշտօնը՝ ծառայելով աւելի քան 560-ամեայ սրբազան այս հաստատութեան երդիքին տակ։ Կու գան բացասական դէպքեր եւ օրեր, սակայն Աստուծոյ կամքով եւ օրհնութեամբ հոգեւոր այս կեդրոնը կը շարունակէ եւ պիտի շարունակէ իր առաքելութիւնը։

Մեր Հոգեւոր Պետը յոյս յայտնեց ու մաղթեց, որ յառաջիկայ օրերը ամէն ինչով ըլլան երջանկաբեր թէ իւրաքանչիւրին համար եւ թէ համայնքիս համար։

Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad