Եկեղեցիներու Համաշխարհային Խորհուրդի Ընդհանուր Քարտուղար Փրօֆ. Տքթ. Ժէրրի Փիլլէյ եւ միջազգային ու միջեկեղեցական օժանդակութեան կազմակերպութեան ACT Allianceի Ընդհանուր Քարտուղար Րուտէլմար Պուէնօ տէ Ֆարիա 4 Ապրիլ 2023, Աւագ Չորեքշաբթի, Մերսինի վրայով Իսկենտերուն մեկնելով հանադիպում ունեցան Հայ, Արաբ Օրթոտոքս եւ Լատին Կաթոլիկ հոգեւոր կեդրոններու պատասխանատուներուն հետ։ Հիւրերուն կ՚ընկերանար Լաքի Վինկաս։
Հիւրերը այցելեցին քաղաքի Արաբ Օրթոտոքս համայնքի Սուրբ Գէորգ Եկեղեցին, ուր հանդիպում ունեցան եկեղեցւոյ հոգեւոր ու աշխարհական վարիչներուն հետ։ Սոյն հանդիպման ներկայ գտնուեցաւ Անտիոքի Եկեղեցեաց Հոգեւոր Հովիւ եւ Գաւառի Համայնքներու Տեսուչ՝ Արժ. Տ. Աւետիս Քհնյ. Թապաշեան եւ Իսկենտերունի Ծխական Խորհուրդի Ատենապետ Եուսուֆ Թապաշեան։ Հանդիպման մասնակիցներ տեղեկութիւններ փոխանցեցին ահաւոր երկրաշարժի գործած աւերներուն մասին եւ ներկայացուցին աւերուած աղօթատեղիներու վերականգման համար իրենց ծրագիրները։
Հիւրերը ապա այցելեցին Հայոց Սրբոց Քառասնից Մանկանց Եկեղեցին ու տեղւոյն վրայ քննարկեցին երկրաշարժի գոյացուցած վթարները։ Տ. Աւետիս Քահանայ Հայրը տեղեկութիւններ տուաւ նաեւ Վաքըֆգիւղի Ս. Աստուածածին Եկեղեցւոյ եւ գիւղի ժողովուրդի կրած վնասներու մասին։
Հիւրերը ապա այցելեցին Լատին Կաթոլիկ Եկեղեցւոյ Առաջնորդ՝ Մոնս. Փաուլօ Պիզէթթիի եւ իր հետ տեսակցութենէն յետոյ հրաժեշտ առին։
Հիւրերը վաղը առաւօտ Անտիոքի վրայով պիտի վերադառնան Ստանպուլ։
Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad
İlk yorum yapan siz olun