Ահաւոր երկրաշարժի յաջորդող օրերուն երբ լսուեցաւ թէ Ատըյեամանի մէջ եւս փլուզումներ յառաջացած էին, Ն.Ա.Տ. Սահակ Բ. Սրբազան Պատրիարք Հօր տնօրինութեամբ փորձուած էր կապ հաստատել Ատըյամանի Ասորւոց Գերշ. Մոր Մէլքի Եիւրէք Սրբազան Մետրոպոլիտին հետ։ Սակայն կարելի չէր եղած երկրաշարժի գօտիին մէջ յառաջացած ելեկտրականութեան խզման պատճառաւ։
Պատրիարքական Փոխանորդ Արժ. Տ. Գրիգոր Աւ. Քհնյ. Տամատեան 11 Փետրուար 2023, Շաբաթ առաւօտ, Մալաթիայէն կրցաւ հեռաձայնով կապուիլ Սրբազան Հօր հետ եւ հաղորդեց Նորին Ամենապատուութեան ցաւակցութիւնները։
Ըստ տրուած տեղեկութեանց, քաղաքի Ասորւոց եկեղեցին անգործածելի վիճակի մատնուած էր եւ երկրաշարժը ահաւոր աւեր գործած՝ քաղաքին մէջ։
Ասորի Մետրոպոլիտը շնորհակալութիւն յայտնեց Նորին Ամենապատուութեան ցուցաբերած հայրական մերձեցման համար, զոր նկատեց մխիթարական, իրենց մատնուած դժուարին վիճակին մէջ։ Յայտնեց իր ակնածանքը եւ խնդրեց որ մեր Հոգեւոր Պետը յիշէ զիրենք իր աղօթքներուն մէջ։
Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad
İlk yorum yapan siz olun