Ն.Ա.Տ. Սահակ Բ. Պատրիարք Հայրը, 9 Փետրուար 2023, Հինգշաբթի, յետ միջօրէին, երկրաշարժի աղէտեալներու համար կատարուած օժանդակութեան աշխատանքները քննելու համար այցելեց մեր չորս եկեղեցիները։
Նորին Ամենապատուութիւնը կարգաւ այցելեց Ֆերիգիւղի Ս. Վարդանանց, Պաքըրգիւղի Ծնունդ Ս. Աստուածածնի, Եշիլգիւղի Ս. Ստեփանոս եւ Սամաթիոյ Ս. Գէորգ եկեղեցիները ու դիմաւորուեցաւ նոյն եկեղեցիներու թաղաին խորհուրդներու ներկայացուցիչներու եւ պատասխանատուներու կողմէ։
Ինչպէս ծանօթ է, Պատրիարքական Աթոռոյ Ընկերային Օժանդակութեան յանձնախումբի եւ զանազան թաղերու աղքատախնամներու գործակցութեամբ իւրաքանչիւր կեդրոնի մէջ կը հաւաքուին նուիրուած գոյքեր, կը քննուին, կը դասաւորուին ու կը ծրարուին՝ աղէտի գօտիի զանազան կեդրոնները ուղարկելու համար։
Իւրաքանչիւր այցելութեան ընթացքին Նորին Ամենապատուութիւնը յայտնեց իր ուրախութիւնը, տեսնելով, որ ցաւալի այս օրերուն մեր համայնքի անդամները սիրայօժար տրամադրութեամբ կը բերէին իրենց օժանդակութիւնը բազմահազար աղէտեալներու ի նպաստ։ Մեր Հոգեւոր Պետը հայրական օրհնութիւնը տուաւ թէ՛ նուիրատուներու եւ թէ եկեղեցիներու Թաղային Խորհուրդներու ու աղքատախնամ մարմիններու կամաւոր աշխատողներուն, որոնք որդիաբար գործակցելով Պատրիարքական Աթոռոյ, իրենց ծառայութիւնը կը բերէին մարդասիրական այս սուրբ գործին։
Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad
İlk yorum yapan siz olun