Ն.Ա.Տ. Սահակ Բ. Սրբազան Պատրիարք Հայրը 7 Նոյեմբեր 2022, Երկուշաբթի ժամը 11.00-ին ընդունեց Օրթագիւղի Թաղային Խորհուրդի նորընտիր կազմը, առաջնորդութեամբ եկեղեցւոյ հոգեւոր հովիւ Արժ. Տ. Զաւէն Աւ. Քհնյ. Պչաքճեանի եւ գլխաւորութեամբ ատենապետ Սարգիս Չէթինքայայի։ Ընդունելութեան Նորին Ամենապատուութեան կողքին ներկայ էր Պատրիարքական Փոխանորդ՝ Տ. Գրիգոր Աւագ Քահանայ Տամատեան։
Սրբազան Պատրիարք Հայրը, շնորհաւորեց կատարուած ընտրութեամբ թաղային խորհուրդի անդամակցութեան կոչուած կազմը։
Իր ուրախութիւնը յայտնեց, թէ յետ ընտրութեան ստացած ըլլալով պատկան պաշտօնարանէն յանձնուած վաւերագիրը, պաշտօնապէս լծուած էին իրենց գործունէութեան։
Սարգիս Չէթինքայա խօսք առնելով շնորհակալութիւն յայտնեց, որ Նորին Ամենապատուութիւնը ընդունած էր նորընտիր կազմը եւ ընդգծեց, թէ նախաընտրական շրջանին իրենց խումբին տուած խոստումները պիտի ջանային կեանքի կոչել։ Մանաւանդ անդրադարձան, թէ խորհուրդի անդամները կը հաւատային համայնքային զօրակցութեան եւ իրերօգնութեան գաղափարին։ Նաեւ յայտնեցին, թէ իրենց գործունէութեան ընթացքին կարեւոր կը նկատէին Պատրիարքական Աթոռի թելադրութիւնները եւ ցուցմունքները։
Թաղային Խորհուրդի անդամներուն եւ մեր Հոգեւոր Պետի միջեւ եղան գաղափարի փոխանակումներ, համայնքային առօրեայ հարցերուն շուրջ։
Նորին Ամենապատուութիւնը իր գոհունակութիւնը յայտնեց եղած ազնիւ արտայայտութիւններուն համար, անգամ մը եւս շեշտեց թէ՝ Օրթագիւղը կարեւոր էր իր ունեցած առաւելութիւններով, մանաւանդ տնտեսական առումով։
Իր հայրական օրհնութիւնը տուաւ ներկայ անդամներուն եւ յաջողութիւն մաղթեց իրենց համայնքանուէր ծառայութիւններուն մէջ։
Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad
İlk yorum yapan siz olun