Ն.Ա.Տ. Սահակ Բ. Պատրիարք Հայրը, 27 Հոկտեմբեր 2022, Հինգշաբթի առաւօտ, ընդունեց Օրթագիւղի Թարգմանչաց Վարժարանի Ը. դասարանի սաները, գլխաւորութեամբ Վարժարանի տնօրէն Մուրատ Մարաշի եւ ուսուցիչներ Արթիւր Պաղտասարեանի, Թալին Կարիփկիւնի եւ Կարին Քաթըքէօյի։ Ընդունելութեան ներկայ եղաւ Պատրիարքական Փոխանորդ Արժ. Տ. Գրիգոր Աւ. Քհնյ. Տամատեան։
Այցելուներ Նորին Ամենապատուութեան շնորհակալութիւն յայտնեցին այս ընդունելութեան համար եւ ըսին թէ ինչպէս անցեալ տարիներ այս տարի ալ փափաքած էին Պատրիարքարան գալ, թէ՛մեր Հոգեւոր Պետին աւելի մօտէն ծանօթանալու, թէ՛ իր օրհնութիւնը ստանալու եւ թէ Կոմիտաս Վարդապետի մահուան տարելիցի այս օրերուն ծաղկեպսակ զետեղելու երջանկայիշատակ Վարդապետի արձանին։
Պատրիարք Հայրը իր ուրախութիւնը յայտնեց նոր սերունդի, յատկապէս մեր համայնքային վարժարաններէն միոյն սաներուն այսպիսի այցելութեան համար համայնքի կեդրոնին՝ Պատրիարքարանին եւ Աթոռոյ Գահակալին։ Նորին Ամենապատուութիւնը անգամ մը եւս ընդգծեց, որ Պատրիարքարանը բոլորին կը պատկանի եւ զանազան պատճառներով կարելի է այցելել, ինչպէս ըրած էին Թարգմանչացի սաները։ Աշակերտները երգեցին «Ով մեծասքանչ դու լեզու» երգը։
Նորին Ամենապատուութիւնը հայրական խրատներ տալէ ետք, գիրքեր նուիրեց աշակերտներուն ու յաջողութիւն մաղթեց իրենց ուսման կեանքին մէջ։
Աշակերտներ, իրենց Տնօրէնին եւ ուսուցիչներուն առաջնորդութեամբ այցելեցին Պատրիարքարանի պարտէզի Կոմիտաս Վրդ.ի արձանը եւ մահուան տարելիցին առթիւ ծաղկեպսակ մը զետեղեցին եւ Անոր յօրինումներէն երգեր երգեցին։
Ապա, այցելեցին Կոլոտ Պատրիարքի անուան թանգարանը ուր շրջեցան եւ տեղեկութիւն ստացան Թանգարանի Տնօրէն Հոգշ. Տ. Յովակիմ Աբղ. Սերովբեանէ։
Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad
İlk yorum yapan siz olun