Ն.Ա.Տ. Սահակ Բ. Սրբազան Պատրիարք Հայրը, 26 Օգոստոս 2022, Ուրբաթ յետ միջօրէին, ընդունեց Հայաստանէն ուխտաւորներու խումբ մը, առաջնորդութեամբ Հարիճավանքէն Արժ. Տ. Եղիշէ Քահանայի։
Խումբը Ստանպուլ եկած էր այցելելու համար զանազան տեսարժան եւ կրօնական վայրեր։ Ապա պիտի մեկնի Վան, մաս կազմելու համար Աղթամարի ուխտագնացութեան, որ տեղի պիտի ունենայ յառաջիկայ կիրակի։
Նորին Ամենապատուութիւնը բարի գալուստ մաղթեց ուխտաւորներուն եւ իր ուրախութիւնը յայտնեց, որ եկած են Պատրիարքարան եւ պիտի մասնակցին նաեւ Աղթամարի ուխտագնացութեան։ Մեր Հոգեւոր Պետը իր հայրական յորդորներով ոգեւորեց զիրենք եւ ոյժ ու կորով մաղթեց ու յարատեւութիւն՝ իւրաքանչիւրին իրենց հոգեւոր կեանքերուն մէջ։
Ապա ուխտաւորներու խումբը, առաջնորդութեամբ Կոլոտ Պատրիարքի անուան թանգարանի պատասխանատու Հոգշ. Տ. Յովակիմ Աբղ. Սերովբեանի այցելեց թանգարան ու տեղեկութիւններ ստացաւ Հայր Սուրբէն։ Հուսկ՝ շրջեցաւ Պատրիարքական Աթոռոյ համալիրն ու Ս. Աստուածածին Աթոռանիստ Մայր Տաճարը։
Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad
İlk yorum yapan siz olun