ԳԱԼՖԱՅԵԱՆԷՆ ԽՈՒՄԲ ՄԸ ՍԱՆԵՐ ՊԱՏՐԻԱՐՔԱՐԱՆԻ ՄԷՋ

Ն.Ա.Տ. Սահակ Բ. Պատրիարք Հայրը, 10 Յունիս 2022, Ուրբաթ, յետ միջօրէին ընդունեց Գալֆայեան Տան Խնամակալութեան անդամներէն Թամար Քարասուն, Վարժարանի Տնօրէն Թամար Ներկիզը, բարերար Մարգրիտ Աթմաճան եւ խումբ մը աշակերտներ։ Հանդիպումին ներկայ էր Արեւմտեան Եւրոպայի Հայրապետական Պատուիրակ ու Վատիկանի մօտ Հայ Եկեղեցւոյ ներկայացուցիչ Գերշ. Տ. Խաժակ Արքեպս. Պարսամեան։

Ինչպէս ծանօթ է, Գալֆայեան Վարժարանի կողմէ կազմակերպուած, Վարսեն Օրունճաքճըէլի անուան միջվարժարանային մարզական մրցումներու 15րդը տեղի ունեցած էր 31 Մայիս 2022ին։

Այս մրցումներուն մասնակցեցան համայնքային վարժարաններէ 300 աշակերտներ, որոնց համար մրցելու առընթեր նախատեսուած էր իրարու հետ ծանօթացում։

Նորին Ամենապատուութիւնը գնահատեց յաջող ձեռնարկն ու կազմակերպողները, բարերարը, ինչպէս նաեւ գաղափարը։ Մեր Հոգեւոր Պետը զրուցեց աշակերտներուն հետ եւ ըսաւ թէ մօտէն կը հետեւի այս ու նման յաջող ձեռնարկներու, բարձր կը գնահատէ եւ կը փափաքի որ նման երեւոյթներ բազմանան։ Նորին Ամենապատուութիւնը անգամ մը եւս յայտնեց իր ուրախութիւնը եւ օրհնեց պատասխանատուներն ու աշակերտները։

Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad