Ն.Ա.Տ. Սահակ Բ. Պատրիարք Հայրը, 7 Յունիս 2022, Երեքշաբթի առաւօտ, ընդունեց Սամաթիոյ Սահակեան Նունեան, Ֆերիգիւղի Մերամէթճեան եւ Թաքսիմի Էսայեան վարժարաններու՝ խումբ մը աշակերտներու այցելութիւնը, կազմակերպութեամբ եւ առաջնորդութեամբ Բարեկամ խումբի պատասխանատուներու։
Այցելուները նախ այցելեցին Ս. Աստուածածին Աթոռանիստ Մայր Տաճար, ուր ընդունուեցան Հոգշ. Տ. Յովակիմ Աբղ. Սերովբեանի կողմէ։ Հայր Սուրբը երկսեռ աշակերտներուն բացատրութիւններ տուաւ Թուրքիոյ Հայ համայնքի եւ եկեղեցւոյ, Պատրիարքական Աթոռոյ մասին։ Ան, հիւրերուն հետ շրջեցաւ Մայր Տաճարի համալիրը, ուրկէ միասնաբար անցան Պատրիարքարան։
Դահլիճին մէջ հիւրեր ընդունուեցան մեր Հոգեւոր Պետին կողմէ, որ հաճելի զրոյց ունեցաւ իրենց հետ։ Գնահատեց տարուած աշխատանքը, որու շնորհիւ շատեր առիթը ունեցան առաջին անգամ այցելել Պատրիարքարան եւ հանդիպիլ Աթոռոյ Գահակալին։
Նորին Ամենապատուութիւնը յաջողութիւն մաղթեց այցելու աշակերտներուն, իրենց ուսուցիչներուն, ինչպէս նաեւ Բարեկամ խումբի անդամներուն եւ գիրքեր նուիրեց իրենց։
Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRHayBad
İlk yorum yapan siz olun