Ն.Ա.Տ.Սահակ Բ. Սրբազան Պատրիարք Հայրը 5 Ապրիլ, Երեքշաբթի, ժամը 16.00-ին ընդունեց Ուսուցչաց Հիմնարկի Վարչութեան Ատենապետ՝ Տիար Սարգիս Քիւլէկէջը, որուն կ՚ընկերանային Տիկին Նաթալի Պաղտատ Քօճապայ եւ Մարիամ Տրամերեան։
Հիւրերը Նորին Ամենապատուութեան նուիրեցին Արժ. Տ. Մաշտոց Քհնյ. Գալփաքճեանի «Ժամանակ» օրաթերթի մէջ ստորագրած յօդուածներու հաւաքածոն, լոյս տեսած՝ «Կեանքը Որ Կ՚ապրինք» անունով։
Նորին Ամենապատուութիւնը, որ իր օրհնութեան գիրով անդրադարձած եւ գնահատած էր Արժ. Տ. Մաշտոց Քահանայի ունեցած գրական արժանիքը, գոհունակութիւնը յայտնեց, նման գիրքի մը հրատարակութեան առթիւ, որով Տէր Հօր վաստակը թերթի սիւնակներէն կը փոխադրուէր գրագարաններու դարակները եւ կարեւորութիւն կը ստանար իր ունեցած հոգեւոր ու կրօնաբարոյական պարունակութեամբ։
Այցելուները Նորին Ամենապատուութեան շնորհակալութիւն յայտնեցին շնորհուած օրհնութեան գիրին համար, որ իր ժամանակին յանձնուած էր Տէր Հօր։
Կը նախատեսուի, որ գիրքի շնորհանդէսը տեղի ունենայ Ս. Փրկիչ Ազգային Հիւանդանոցի մէջ, ուր կը խնամուի հեղինակ Տէր Հայրը։
Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRArmenianPatriarchate
İlk yorum yapan siz olun