Ա.Մ.Ն-ՈՒ ԴԵՍՊԱՆԻՆ ԱՅՑԸ

Ն.Ա.Տ. Սահակ Բ. Պատրիարք Հայրը, 25 Փետրուար 2022, Ուրբաթ, ընդունեց Ա.Մ.Ն-ու Լիազօր դեսպան Ճէֆֆ Ֆլէյքի այցելութիւնը։ Մեծայարգ հիւրին կ’ընկերանար կողակիցը, Ա.Մ.Ն-ու Ստանպուլի Աւագ Հիւպատոս Տարիա Տէրնըլ եւ Քաղաքական Գործերու Պատասխանատու Քէվըն Մօզ։

Մեծայարգ Լիազօր դեսպանը, առիթ համարելով քաղաքս ներկայութիւնը՝ եկած էր քաղաքավարական այցելութեամբ ծանօթանալու համար Թուրքիոյ Հայ համայնքի հոգեւոր կեդրոնին՝ Պատրիարքարանին եւ Նորին Ամենապատուութեան։ Մեր Հոգեւոր Պետը ինչ ինչ տեղեկութիւններ փոխանցեց Ստանպուլահայ համայնքի, Հայ Եկեղեցւոյ ու Պատրիարքական Աթոռոյ մասին։

Ի յիշատակ սոյն այցելութեան, մեծայարգ հիւրը յուշապնակ մը նուիրեց Նորին Ամենապատուութեան։ Իսկ մեր Հոգեւոր Պետը հիւրին նուիրեց Կարօ Քիւրքմանի Հայ նկարիչներու երկհատոր աշխատասիրութիւնը։

Պատրիարքարանի պաշտօնական հանդիպումի աւարտին Նորին Ամենապատուութիւնը իր հիւրերուն հետ այցելեց Ս. Աստուածածին Աթոռանիստ Մայր Տաճար։

Մտերմիկ այցելութեան աւարտին, Լիազօր դեսպան Ֆլէյք ընդունելութեան համար յայտնեց իր շնորհակալութիւնը։

Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRArmenianPatriarchate