ՊԱՏՐԻԱՐՔ ՀԱՅՐԸ ԸՆԴՈՒՆԵՑ ՀՐԱՆԴ ՏԻՆՔ ԱՆՈՒԱՆ ԴՊՐՈՑԻ ՊԱՏԱՍԽԱՆԱՏՈՒՆԵՐԸ

Ն.Ա.Տ. Սահակ Բ. Պատրիարք Հայրը, 27 Յունուար 2022, Հինգշաբթի, Պատրիարքարանի մէջ ընդունեց Կէտիկփաշայի Հայ Աւետարանական Եկեղեցւոյ մէջ գործող Հրանդ Տինք անուան դպրոցի գլխաւոր բարերարներ՝ Արթօ եւ Դալար Հորոզօղլու ամոլը։

Անոնք տեղեկութիւններ փոխանցեցին վարժարանի մասին եւ Նորին Ամենապատուութիւնը հրաւիրեցին վարժարանի ի նպաստ մատաղօրհնութեան, որ տեղի պիտի ունենայ յառաջիկայ 30 Յունուար 2022, Կիրակի, Ս. Աստուածածին Աթոռանիստ Մայր Տաճարի մէջ։

Պատրիարք Հայրը հայրական թելադրութիւններ ըրաւ ներկաներուն եւ շեշտեց կրթական առաքելութեան կարեւորութիւնը։ Մեր Հոգեւոր Պետը սիրով ընդառաջեց հրաւէրին եւ յաջողութիւն մաղթեց այցելուներուն իրենց կրթանուէր գործունէութեան մէջ։

Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRArmenianPatriarchate