Ն.Ա.Տ. Սահակ Բ. Պատրիարք Հայրը, 7 Դեկտեմբեր 2021, Երեքշաբթի, ժամը 11.00-ին, Պատրիարքարանի մէջ ընդունեց Օրթագիւղի Ս. Թարգմանչաց Վարժարանէ աշակերտաց խումբ մը, առանջորդութեամբ Տնօրէն՝ Արաս Տէլիճէի եւ Կրօնագիտութեան ուսուցչուցի՝ Թալին Չօրթան Կարիբկիւնի։
Այցելու պատասխանատուներ, նախ շնորհակալութիւն յայտնեցին Ամենապատիւ Սրբազան Պատրիարք Հօր, քանի ինք հայրաբար ժամանակ տրամադրած էր վարժարանի աշակերտներուն եւ անոնց առաջնորդող պատասխանատուներուն։ Անոնք, յայտնեցին, թէ՝ սոյն այցելութիւնը կը նպատակէր աշակերտները առաւել եւս ծանօթացնելու Պատրիարքական Աթոռոյ եւ Ամենապատիւ Սրբազան Պատրիարք Հօր։ Առ այդ, Պատրիարք Հայը զրուցեց աշակերտներու հետ եւ ուզեց որ հարցնեն իրենց հարցումները։ Բաց աստի մեր Հոգեւոր Պետը ուրախութիւն յայտնեց նկատի ունենալով որ աշակերտներ Աթոռոյ ծանօթանալու առիթը գտած էին։ Այս ուղղութեամբ իրենց յայտնեց, թէ՝ Պատրիարքարանը կը պատկանի բոլոր ժողովուրդին, հետեւաբար երբեք չքաշուին այստեղ այցելելու։ Տղաքը եւս ոգեւորուած էին, լսելով Պատրիարք Հօր ջերմ արտայայտութիւնները եւ հայրական խրատները։
Հանդիպման առիթով, Մեր Հոգեւոր Պետը գնահատեց նաեւ յարգելի տնօրէնն ու կրթական մշակը, քանի կազմակերպած էին սոյն այցելութիւնը։ Բաց աստի, Պատրիարք Հայրը, այցելութեան որպէս յիշատակ տղոց նուիրեց պատկերազարդ Աստուածաշունչ ու թելադրեց որ, անպայման ընթերցեն Ս. Գիրքը եւ օտար չմնան իրենց պապենական հաւատքին։
Հանդիպման աւարտին այցելուներ առաջնորդուեցան Աթոռոյս Յովհաննէս Կոլոտ Պատրիարքի անուան թանգարանը, ուր Հոգշ. Տ. Յովակիմ Աբղ. Սերովբեանէ տեղեկութիւններ ստացան։
Աղբիւր։ ՊատրիարքութիւնՀայոց – Ermeni Patrikligi https://www.facebook.com/TRArmenianPatriarchate
İlk yorum yapan siz olun