Թուրքիայում Հայոց ցեղասպանության ժխտմանը նվիրված միջազգային գիտաժողով է մեկնարկել

Ապրիլի 20-ին Թուրքիայում մեկնարկել է «1915թ․ իրադարձությունների վերաբերյալ գիտաժողով» խորագրով միջոցառումը, որը նվիրված է Հայոց ցեղասպանության ժխտմանը։ Թուրքիայի նախագահի ներկայացուցիչը հայտարարել է, թե «անթույլատրելի են պատմական իրադարձությունների կեղծումն ու քաղաքականացման փորձերը»:

«Այսպես կոչված Հայոց ցեղասպանության մեղադրանքը միայն քաղաքական նպատակներ հետապնդող զրպարտություն է»,- համաժողովին հայտարարել է նախագահի աշխատակազմի՝ հասարակայնության հետ կապերի վարչության ղեկավար Ֆահրեթթին Ալթունը:

Նրա խոսքով՝ «Առաջին համաշխարհային պատերազմը լի է ողբերգական էջերով, որոնք որոշ շրջանակներ փորձում են օգտագործել հօգուտ իրենց շահերի»:

«Տարբեր պետությունների խորհրդարանների որոշումները ժողովրդավարության օրինակ չեն կարող լինել: Պատմական իրադարձություններին տալով կանխակալ գնահատական՝ նպատակ է դրվում ճնշում գործադրել Անկարայի վրա»,- ասել է Թուրքիայի նախագահի ներկայացուցիչը:

Պաշտոնական Անկարան պնդում է, որ Թուրքիան «արդարության կողմնակիցն է», որի ապացույցը Ռեջեփ Թայիփ Էրդողանի՝ 1915 թվականի դեպքերը քննելու համար պատմաբանների ընդհանուր հանձնաժողով ստեղծելու առաջարկն է:

Գիտաժողովին, բացի թուրք գիտնականներից, մասնակցում են հետազոտողներ ԱՄՆ-ից, Ռուսաստանից, Ադրբեջանից, Ֆրանսիայից, Իռլանդիայից։

Գեորգի Միրզաբեկյան

---

https://www.civilnet.am/news/600260/%d5%a9%d5%b8%d6%82%d6%80%d6%84%d5%ab%d5%a1%d5%b5%d5%b8%d6%82%d5%b4-%d5%b0%d5%a1%d5%b5%d5%b8%d6%81-%d6%81%d5%a5%d5%b2%d5%a1%d5%bd%d5%ba%d5%a1%d5%b6%d5%b8%d6%82%d5%a9%d5%b5%d5%a1%d5%b6-%d5%aa%d5%ad%d5%bf%d5%b4%d5%a1%d5%b6%d5%a8-%d5%b6%d5%be%d5%ab%d6%80%d5%be%d5%a1%d5%ae-%d5%b4%d5%ab%d5%bb%d5%a1%d5%a6%d5%a3%d5%a1%d5%b5%d5%ab%d5%b6-%d5%a3%d5%ab%d5%bf%d5%a1%d5%aa%d5%b8%d5%b2%d5%b8%d5%be-%d5%a7-%d5%b4%d5%a5%d5%af%d5%b6%d5%a1%d6%80%d5%af%d5%a5%d5%ac/