ՀՀ վարչապետի գլխավոր խորհրդական Արայիկ Հարությունյանն այսօր՝ ապրիլի 19-ին, մամուլի ասուլիսի ժամանակ նշեց, թե ինչ միջոցառումներ են նախատեսված ապրիլի 23-ին եւ 24-ին:
Նրա խոսքով, «Հիշատակի եռերգություն» կոչվող միջոցառումների շարքում ապրիլի 23-ին ժամը 23-ին Ծիծեռնակաբերդի ցեղասպանության հուշահամալիրում կկատարվի Ջուզեպպե Վերդիի «Ռեքվիեմը»: Հանդես կգան Հայաստանի ազգային ֆիլհարմոնիկ նվագախումբը՝ եւ Հայաստանի պետական ակադեմիական երգչախումբը: Այն կղեկավարի Էդուարդ Թոփչյանը: Համերգը հեռարձակվելու է ուղիղ եթերում:
Ապրիլի 23-ի լույս 24-ի գիշերը՝ ժամը 24:00-ին, Կոմիտասի անվ. կամերային երաժշտության տանը Գերմանիայից հրավիրված դիրիժոր Ալ. Իռադյանի ղեկավարությամբ Հայաստանի պետական կամերային նվագախմբի և «Հովեր» պետական կամերային երգչախմբի մասնակցությամբ կհնչի Վ. Ա. Մոցարտի «Ռեքվիեմ»-ը:
Ապրիլի 24-ին՝ ժամը 19:15-ին, Կ. Դեմիրճյանի անվ. մարզահամերգային համալիրում Հայաստանի ազգային սիմֆոնիկ նվագախմբի, Հայաստանի պետական կամերային երգչախմբի և Երևանի պետական կամերային երգչախմբի մասնակցությամբ տեղի կունենա համերգ՝ Տիգրան Մանսուրյանի «Ռեքվիեմ»-ի կատարմամբ: Այս միջոցառմանը նախատեսվում են դիվանագիտական պատվիրակությունների մասնակցություն, համերգը կլինի Նիկոլ Փաշինյանի հովանու ներքո:
Կլինեն նաեւ այլ միջոցառումներ: Մասնավորապես, ԱԳՆ-ի կողմից դիվանագիտական ներկայացուցչությունների եւ մեր հանրության համար ցուցահանդես է նախատեսվում ապրիլի 24-ին Երեւանի քաղաքապետարանի նախասրահում, որը կվերաբերի Արցախում մեր հուշարձանների վիճակին: Ցուցահանդեսը կրելու է «Վտանգված ժառանգություն» խորագիրը: Մուտքը բաց է լինելու բոլորի համար:
Ապրիլի 21-ին ժամը 21-ին Հայոց ցեղասպանության թանգարան-ինստիտուտում ժամանակավոր ցուցադրություն է լինելու, որը կկրի «Հայոց ցեղասպանությունը վերապրածների հետքերով» խորագիրը: Այն կլինի մինչեւ սեպտեմբերի 10-ը:
Ապրիլի 27-ին տեղի կունենա ավանդական ծաղկահավաքը, որտեղ ավանդաբար թերթիկներից թուղթ են պատրաստում, որն օգտագործվում է շնորհակալագրեր ուղարկելու համար:
İlk yorum yapan siz olun