Ադրբեջանը Քելբաջարին (Քարվաճառ) կապող նոր ավտոճանապարհ է կառուցելու: Այդ մասին հայտնել է Ադրբեջանի ավտոմոբիլային ճանապարհների պետական գործակալության ղեկավար Սալեհ Մամմադովը՝ նշելով, որ Իլհամ Ալիևի հրամանով պետք է կարճ ժամանակահատվածում բարեկարգվեն գրավյալ շրջաններ տանող բոլոր ճանապարհները:
Նոր ճանապարհը, որը անցնելու է Գյանջայով (Գանձակ) և Գյոյգյոլով, կառուցվելու է թուրքական ընկերության հետ համատեղ, աշխատանքները սկսվելու են մարտից:
Ադրբեջանցի պաշտոնյայի փոխանցմամբ՝ «բնակչության ապահով տարանցումը ապահովող» ճանապարհի նախագծման աշխատանքները տևել են շուրջ 2 ամիս:
Ներկայում ադրբեջանական կողմը Քելբաջարի հետ հաղորդակցությունն ապահովում է ռուս խաղաղապահների ուղեկցությամբ Թարթառ-Մարտակերտ ճանապարհով: Մեկ ամիս առաջ մարտակերտցիները փակել էին Մարտակերտ-Վարդենիս ճանապարհը՝ բողոքելով, որ դրանից հայկական կողմը, ի տարբերություն ադրբեջանականի, չի կարողանում օգտվել:
Գեորգի Միրզաբեկյան
Yorumlar kapatıldı.