Հայրենիքի Փրկութեան Շարժումի Յայտարարութիւնը. «Հայաստանի Ու Արցախի Շահերի Դէմ Ընդունուող Որեւէ Որոշում Ճանաչուելու Է Ոչ Օրինական»

11 յունուարին նախատեսուած Նիկոլ Փաշինեան-Իլհամ Ալիեւ հանդիպման հետ կապուած բազմաթիւ մտահոգութիւններ եւ տագնապներ կան քաղաքական-հասարակական լայն շրջանակներում: Այդ հանդիպման արդիւնքները կարող է վերածուել «նոյեմբերի 9»-ի անձնատուութեան շարունակութեան:

Թեմայի վերաբերեալ պարզաբանումներ ստանալու նպատակով մենք նախաձեռնել էինք հանդիպում արտաքին գործերի նախարարի, Ազգային անվտանգութեան ծառայութեան տնօրէնի, Զինուած ուժերի գլխաւոր շտաբի պետի հետ:

Օնիկ Գասպարեանն ու Արմէն Աբազեանը խուսափեցին հանդիպումից, ինչը խորացրեց մեր մտահոգութիւններն ու կասկածները:

Ողջունում ենք արտաքին գործոց նախարար Արա Այվազեանի` մեզ հանդիպելու եւ որոշ հարցերի շուրջ պարզաբանումներ ներկայացնելու փաստը:

Հայրենիքի փրկութեան շարժումը յայտարարում է, որ Հայաստանի ու Արցախի շահերի դէմ ընդունուող ցանկացած որոշում ճանաչուելու է ոչ օրինական, մերժուելու է հայ ժողովրդի կողմից, չի վաւերացուելու ու չեղարկուելու է իշխանափոխութիւնից յետոյ:

Ենթադրեալ համաձայնութեան բոլոր կողմերին զգուշացնում ենք, որ Նիկոլ Փաշինեանը չի ներկայացնում Հայաստանը եւ Արցախը, չունի համապատասխան լիազօրութիւն:

Հայրենիքի փրկութեան շարժումը կոչ է անում Հայաստանի քաղաքացիներին տէր կանգնել մեր երկրին ու թոյլ չտալ դաւաճանութեան յաղթարշաւ:

Մեր երկրի աղէտալի ընթացքը կանգնեցնելու միակ տարբերակը դաւաճան իշխանութեան հեռացումն է եւ մենք ամբողջ թափով շարունակելու ենք պայքարն այդ ուղղութեամբ:

ՎԱԶԳԷՆ ՄԱՆՈՒԿԵԱՆ
ՀԱՅՐԵՆԻՔԻ ՓՐԿՈՒԹԵԱՆ ՇԱՐԺՈՒՄ

---

Aztag Daily