Սիրելի՛ զաւակներ մեր, ի Հայաստան, Արցախ եւ ի սփիւռս,
Մայր Աթոռ Սուրբ Էջմիածնից հայրական մեր ողջոյնը, աղօթքն ու օրհնութիւնն ենք բերում ձեզ տարեմուտի այս երեկոյ:
Հնի ու նորի սահմանագծին, երբ մեր հայեացքն ուղղւում է դէպի ապագայ, ծանր հոգով նաեւ վերյիշում ենք չարաղէտ 2020 թուականը, եւ սգում մեր հազարաւոր զաւակների ու Արցախ աշխարհի զգալի մասի կորուստը:
Անցնող տարում համավարակի եւ պատերազմի արհաւիրքները կորստեան ցաւ եւ մահուան վիշտ տարածեցին հայրենական մեր կեանքում: Մեր հոգիները ալեկոծեցին նաեւ Սիրիայում չընդհատուող պատերազմի ծանր հետեւանքները եւ աղէտալի դէպքերը Լիբանանում:
Հայաստան եւ Արցախ մեր երկրի առջեւ ծառացած քաղաքական, տնտեսական եւ ընկերային մարտահրաւէրները, հայրենիքի սահմաններին անկայուն խաղաղութիւնը, ապագայի անորոշութիւնը արդարեւ տկարացրել են մեր ժողովրդի զաւակների լաւատեսութեան ոգին: Յուսախաբ ենք այո, բայց Աստծուն ապաւինած լի ենք հաւատով, որ պիտի յաղթահարենք դժուարին այս ճգնաժամը:
«Դու չես լքի նրանց, ովքեր փնտռում են քեզ, Տէ՛ր»: Սաղմոսերգուի այս խօսքերը հոգում ծուարած մեր ժողովուրդը բոլոր ժամանակներում իր յուսավառ հայեացքը ուղղել է դէպի գալիքը, հայոց անկախ պետականութեան նուիրական տեսիլքն ու անհատնում ձգտումն իր սրտում, ազգս հայոց զօրութիւնն է ունեցել յառնելու ամենածանր փորձութիւններից, անգամ հայրենազրկումի եւ ցեղասպանութեան արհաւիրքներից: Այսօր էլ հաւատում ենք, որ ներուժն ունի վերակազմակերպելու իր կեանքը, զօրացնելու հայրենի պետութիւնը:
Հայրենաշինութեան սրբազան առաքելութիւնը յաջողութեամբ պիտի պսակուի միայն մեր ժողովրդի առողջ ու կարող բոլոր ուժերի համերաշխ մասնակցութեամբ եւ միաբանութեան ոգով:
Միաբանութիւնը, ինչպէս գրում է Մեծն Եղիշէ վարդապետը, բարի գործերի մայրն է, անմիաբանութիւնը` չար գործերի ծնողը:
Սիրելինե՛ր,
Հայրապետից յորդորն ու պատգամն է. ստեղծուած լրջագոյն իրադրութեան առջեւ զօրանալ հաւատով եւ ամրապնդել վճռականութիւնը, որպէսզի ամենայն յանձնառութեամբ կառուցենք եւ սերունդներին աւանդենք հզօր, բարօր եւ անվտանգ հայրենիք:
Աստծոյ խօսքին ու քրիստոնէական արժէքներին հաւատարիմ հոգ տանենք միմեանց եւ ջերմագին սիրով առ բազմաչարչար մեր հայրենիքը, մեր ջանքերն ու ուժերը մէկտեղենք ի նպաստ ազգային ու հայրենական մեր կեանքի նորոգութեան ու պայծառութեան, մեր հայրենիքը հզօրացնելու, մեր պետականութիւնը վտանգներից զերծ պահելու, մեր սահմանները խաղաղ ու ապահով դարձնելու եւ համայն մեր ժողովրդի կեանքը շէնացնելու պատասխանատուութիւնն ամէնքինս է: Այս գիտակցութեամբ հայրենիքի նոր օրը խարսխենք եղբայրսիրութեան, արդարութեան եւ օրինայարգութեան վրայ:
Աղօթենք ու երախտագէտ սրտով յիշենք մեր նահատակներին, շուտափոյթ վերադարձ մաղթենք մեր գերեվարուածներին, ապաքինութիւն վիրաւոր մեր զաւակներին եւ խնդրենք Աստծոյ զօրակցութիւնը եւ օրհնութիւնը նրանց, մեր հերոսների ընտանիքներին եւ համայն մեր ժողովրդին:
Աղօթենք հայրենեաց պաշտպանութեան դիրքերում գտնուող մեր բանակի քաջարի զօրականների եւ բոլոր նրանց համար, որոնք տարեմուտը դիմաւորում են ծառայութեան մէջ: Աղօթքով յիշենք նաեւ համավարակից մահացած մեր ժողովրդի զաւակներին: Ամենագութ Աստուած, բարերար քո կամքով եւ ամենառատ ողորմութեամբ թող 2021 թուականը լինի խաղաղութեան, ազգաշէն ու հայրենանպաստ իրագործումների տարի եւ մխիթարութիւն բերի մեր սրտերին, զօրութիւն եւ յաղթութիւն հայոց կեանքին:
Աստուած պահապան մեր հայրենիքին եւ ժողովրդին: Բարի օրհնեալ տարի:
Yorumlar kapatıldı.