Ուաշինկթընի մէջ Ռուսիոյ դեսպան Անաթոլի Անթոնով ԹԱՍՍ լրատու գործակալութեան տուած ամավերջի հարցազրոյցին մէջ գնահատած է նոյեմբերին Միացեալ Նահանգներու մէջ տեղի ունեցած նախագահական ընտրութեան լոյսին տակ Միացեալ նահանգներու հետ յարաբերութիւններու հետագայ զարգացման հեռանկարները, խօսած է համագործակցութեան ընդլայնումի հաւանական շարժիչներու, ինչպէս նաեւ այն մասին, թէ երբ կարելի է սպասել նորընտիր նախագահ Ճօ Պայտընի Մոսկուա հրաւիրուելուն:
Պատասխանելով այն հարցումին, թէ դեսպանը ինչպէ՛ս կը գնահատէ նախագահական ընտրութիւնը եւ ատիկա ի՛նչ ազդեցութիւն կ՛ունենայ ռուս-ամերիկեան յարաբերութիւններուն վրայ, Անթոնով ըսած է. «Միացեալ Նահանգներու մէջ ընտրութիւնները կայացած են: Ռուսիոյ նախագահ Վլատիմիր Փութին շնորհաւորած է Ճօ Պայտընը անոր յաղթանակին առիթով: Պիտի սահմանափակուինք միայն հաստատելով Ռուսիոյ պատրաստակամութիւնըհաւասարութեան եւ փոխադարձ յարգանքի հիման վրայ իրատեսական երկխօսութիւն վարելու վերաբերեալ
ըլլայ այդ Տանըլտ Թրամփի ներկայ վարչակազմի, թէ Ճօ Պայտընի ապագայ կառավարութեան հետ», նշած է դեսպանը:
Միեւնոյն ժամանակ Անթոնով աւելցուցած է, որ ամերիկեան վերնախաւերու ենթագիտակցութեան մէջ խորապէս արմատաւորուած է ռուսատեացութիւնը:
«Վերջին տարիներուն Ռուսիոյ եւ Միացեալ Նահանգներու յարաբերութիւնները կը գտնուին խոր ճգնաժամի մէջ: Մենք պատրանք չունինք, որ նոր նախագահին ընտրութեամբ ամէն ինչ յանկարծ դէպի լաւ պիտի փոխուի: Ատոր համար հիմքեր քիչ կան:
«Մենք կը մեկնինք Ռուսիոյ ուղղութեամբ Ուաշինկթընի սկզբունքային վարմունքէն: Մեր երկիրը յայտարարուած է հակառակորդ: Այս սահմանումը ընդգրկուած է Միացեալ Նահանգներու վարչակազմի փաստաթուղթերուն մէջ եւ լայն համաձայնութիւն կը վայելէ տեղական ենթակառոյցներուն մօտ:
Մոսկուայի համակարգային զսպման համար կ՛օգտագործուի տնտեսական, ռազմաքաղաքական եւ քարոզչական ազդեցութեան միջոցներու ամբողջ զինանոցը», նշած է ռուս դիւանագէտը:
Yorumlar kapatıldı.