Մարտակերտի շրջանի Նոր Մարաղա, Նոր Այգեստան, Նոր Սեյսուլան, Նոր Կարմիրավան, Նոր Հայկաջուր, Հովտաշեն եւ Նոր Ջրաբերդ բնակավայրերը այսօրվանից անցել են Ադրբեջանի վերահսկողության տակ։ Բնակիչներին նոյեմբերի 17-ին են ասել, որ երկու օր ժամանակ ունեն տեղահանման համար, այսինքն՝ մինչեւ նոյեմբերի 19, ժամը 23։00-ն։
«Իրենք 90-ականներին էլ են իրենց տները թողել, ընդ որում սովետական տարիներին իրենց գյուղերը գտնվում էին Լեռնային Ղարաբաղի ինքնավար մարզի տարածքում։ Այստեղ շատ լուրջ խնդիր կա, սակայն պատերազմի իրողությունն է սա, եւ քանի որ սովետական տարիներին Աղդամի շրջանի մեջ էր գտնվում այս տարածքը, կարծես թե այդ պատճառով էլ այս գյուղերն էլ պետք է դատարկվեն»,- ասում է Արցախի Մարդու իրավունքների պաշտպան Արտակ Բեգլարյանը։
Հեռանալուց առաջ գյուղացիները այրում են իրենց տները, դա բացատրում են հետեւյալ կերպ․
«Դե մարդկանց էլ կարելի է հասկանալ, եթե 90-ականներին տները թողել են, երկրորդ անգամ ինչի՞ թողնեն, չգիտեմ՝ ճի՞շտ է, թե՞ սխալ, համենայնդեպս, էդպես ենք անում»,- ասում է Նոր Մարաղայի բնակիչներից մեկը։
«30 տարի է տուն եմ դրել, որ տան թուրքի՞ն, համ ջահել բալաներին տամ թուրքին, համ արյունը, համ էլ վեշերս տա՞մ թուրքին»,- արցունքն աչքերին նշում է տարեց մի կին։
Տներն այրելուն, սակայն, ոչ բոլորն են կողմ։
«Հույս ունենք, որ կարող է ինչ-որ փոփոխություններ լինեն, վերադառնանք, մեր տան տանիքը նորից նորոգենք, մեր տանն ապրենք»,- հավելում է բնակիչներից մեկը։
Ըստ ՄԻՊ-ի՝ Կառավարությունն ամեն ինչ անելու է սկզբնական շրջանում տեղահանվածներին ժամանակավոր կացարաններ տալու համար, որից հետո էլ փորձելու են բոլորի օթեւանների հարցը լուծել։
Տեսանյութը՝ Արցախի Հանրային հեռուստաընկերության
İlk yorum yapan siz olun