İçeriğe geçmek için "Enter"a basın

ՀԱՂՈՐԴԱԳՐՈՒԹԻՒՆ

Լիբանանի Թեմի Ազգային երեսփոխանական ժողովը, որ գումարուեցաւ ուրբաթ, 24 յուլիս 2020-ին, կարեւորութեամբ անդրադարձաւ «Քորոնա» ժահրին եւ Լիբանանի տնտեսական տագնապին ստեղծած ճգնաժամային կացութեանց, որոնցմէ անմասն չէ լիբանանահայ համայնքը: Ժողովը կատարեց հետեւեալ հաստատումները.

Ա.- Որդիական սիրով կու գանք մեր երախտագիտութիւնը յայտնելու Մեծի Տանն Կիլիկիոյ Ս. Աթոռի գահակալ` Ն․Ս․Օ․Տ․Տ․ Արամ Ա. Վեհափառին, որ բարձրօրէն կարեւորելով լիբանանահայ գաղութի համահայկական դերակատարութիւնը, կաթողիկոսութեան բոլոր կարելիութիւնները ի սպաս դրաւ լիբանանահայութեան օժանդակութեան գործին ու իր անձին հեղինակութեամբ կը շարունակէ զօրավիգ հանդիսանալ մեր գաղութին:

Բ.- Ազգային Առաջնորդարանը եւ անոր կից գործող մարմիններն ու կառոյցները, Կաթողիկոսական փոխանորդի գլխաւորութեամբ, գնահատելի ճիգով կը շարունակեն անսալ լիբանանահայութեան ընկերատնտեսական եւ առողջապահական կարիքներուն, յատկապէ՛ս մեղմելու համար կարիքաւոր զանգուածի դժուարութիւններն ու ցաւը:

Գ.- Գնահատելի է «Քորոնա»-ի ճգնաժամային շտապի գործունէութիւնը, որ, համայնքի բոլոր միութիւններուն ու կառոյցներուն կարելիութիւնները համախմբելով, յաջողեցաւ ամենակարճ միջոցին համավարակի կանխազգուշացման, կանխարգիլման ու հականեխումի ծառայութիւններ մատուցելու գործը կազմակերպել եւ ժողովրդային օժանդակութեան ընդհանուր աշխատանքին ուղղութիւնը ճշդել: Հաւաքական այս ներդրումը միշտ` անցեալին եւ այսօ՛ր ալ, իր օգտաշատ արդիւնքը տուած է լիբանանահայ գաղութի բոլոր մարտահրաւէրներու յաղթահարման ու դարձած հարուստ կենսափորձ մեր հաւաքական կեանքին մէջ:

Դ.- Երախտագիտութեամբ կ՛ողջունենք լիբանանահայութեան զօրակցութեան համար տարբեր գաղութներու մէջ նուիրահաւաքներ կազմակերպող կառոյցներն ու մարմինները, որոնք գործնապէս կը հաստատեն, որ լիբանանահայութիւնը կը շարունակէ իր ինքնուրոյն տեղն ու դերը ունենալ բովանդակ հայութեան կեանքին մէջ:

Ե.- Ստեղծուած համահայկական զօրակցութեան համար բարձրօրէն կը կարեւորենք «Հայաստան Համահայկական հիմնադրամ»-ի, Ս. Էջմիածնի Կաթողիկոսութեան, Արցախի Հանրապետութեան, Մեծի Տանն Կիլիկիոյ Կկաթողիկոսութեան թեմերու օժանդակութիւնները:

Զ.- Մեր երախտագիտութիւնը կը յայտնենք հեռաւոր կամ մօտաւոր մեր բոլոր բարերարներուն ու նուիրատուներուն, որոնք հաւաքական ծրագիրներու յաջողութեան համար կը շարունակեն բերել իրենց անսակարկ ու կարեւոր մասնակցութիւնը: Ժողովը կ՛ողջունէ նաեւ իրերօգնութեան համակող այս մթնոլորտին մէջ արտասահմանէն հասնող օգնութեան այն ձեռքերը, որոնք հարազատին, հիւանդին, անկարին ու կարիքաւորին հասնելով, մեծապէս կը թեթեւցնեն մեր ժողովուրդին բեռը:

Է.- Ազգային երեսփոխանական ժողովը մեծապէս գնահատելով նաեւ Լիբանանահայոց թեմի եկեղեցիներուն, մեր միութիւններուն, բարեսիրական հաստատութիւններուն, կառոյցներուն ու հայրենակիցներուն բոլորանուէր ճիգը, կը հաստատէ, որ լիբանանահայ գաղութը պիտի յաջողի յաղթահարել իր դէմ ծառացող այս ճգնաժամը ու կը վստահեցնէ, որ Ազգ. Առաջնորդարանը, մի՛շտ վստահելով մեր ժողովուրդի բոլոր զաւակներու անվերապահ աջակցութեան եւ ցուցաբերած բարձր գիտակցութեան, պիտի շարունակէ մատուցել իր ընկերային, մարդասիրական եւ կրթական ծառայութիւնները:

ԱԶԳԱՅԻՆ ԵՐԵՍՓՈԽԱՆԱԿԱՆ ԺՈՂՈՎ

Պէյրութ, 24/7/2020

https://www.facebook.com/armprelacylb/photos/a.377088545792919/1573371882831240/?type=3&theater

İlk yorum yapan siz olun

Bir Cevap Yazın