Ուրբաթ, 24 Յունուար, 2020-ին, Հայաստանի Հանրապետութեան նախագահ Վսեմաշուք՝ Տիար Արմէն Սարգսեան այցելեց Բեթղեհէմի Ս. Ծննդեան Տաճար: Տաճարի մուտքին նախագահ Սարգսեան դիմաւորուեցաւ Բեթղեհէմի կառավարչի, քաղաքապետի, ոստիկանապետի, Պաղեստինի ընդհանուր ոստիկանապետի, Սուրբ Աթոռոյս Լուսարարապետ՝ Տ. Սեւան Արք. Ղարիպեանի, ինչպէս նաեւ Ս. Ծննդեան Տաճարի իրաւատէր երեք համայնքներու տեսուչներէն: Սուրբ Ծննդեան Այր կատարած այցէն յետոյ նախագահ Սարգսեան այցելեց տաճարին կից Հայոց Վանք եւ հանդիպում ունեցաւ Բեթղեհէմի հայ համայնքի ներկայացուցիչներու եւ տարբեր հիւրերու հետ: Հանդիպման ընթացքին ողջոյնի խօսքով հանդէս եկան Բեթղեհէմի քաղաքապետ՝ Տիար Անտոն Սալման եւ Սուրբ Աթոռոյս Լուսարարապետ՝ Գերշ. Տ. Սեւան Արք. Ղարիպեան: Քաղաքապետ Տիար Անտոն Սալման քաղաքապետարանի անունով մասնաւոր նուէր յանձնեց Տիար Սարգսեանի:
Հանդիպմանը Պատրիարքարանէն ներկայ էին նաեւ Աւագ Թարգման՝ Տ. Տիրան Աբղ. Յակոբեան, Դիւանապետ՝ Տ. Կորիւն Վրդ. Բաղդասարեան, Ս. Ծննդեան Տաճարի տեսուչ՝ Տ. Ասպետ Վրդ. Պալեան եւ նոյն Տաճարի ծիսակատար՝ Տ. Վահագն Քհնյ. Սինանեան:
https://www.facebook.com/117729778305019/posts/2704358779642093/
İlk yorum yapan siz olun