İçeriğe geçmek için "Enter"a basın

Հակահայ Դատապարտելի Արարք՝ Կլենտէյլի Մէջ

Հայ Ամերիկեան Տարեցներու Միութեան պատասխանատուներէն կ՛իմանանք, որ նախանցեալ գիշերուան ընթացքին, անյայտ անձեր հակահայ «կրաֆիթի»ներ գրած են միութեան 407 East Colorado Street հասցէին գտնուող շէնքի պատին վրայ: «Մահ հայերուն» եւ «Թրամփ կ՛ըսէ՝ անմիջապէս հեռացէք» գրութիւնները գրուած են շէնքին վրայ:

Կլենտէյլ քաղաքի ոստիկանական աղբիւրներ «Ասպարէզ»ին յայտնեցին, որ այս արարքը իրենք կը համարեն Ատելութեան Ոճիռ (Hate Crime): «Ընդհանրապէս «Ատելութեան ոճիռ» կը համարենք, երբ այսպիսի արտառոց ու բացայայտ արարքի մը ականատես կ՛ըլլանք», ըսաւ ոստիկանութեան հանրային տեղեկատուութեան գրասենեակի խօսնակ Տեն Սաթըլզ՝ աւելցնելով, որ ներկայիս ոստիկանութիւնը քննութիւն բացած է նոյն շրջանին մէջ «կրաֆիթի»ի նմանօրինակ այլ արարքներու վերաբերեալ:

«Այս շրջապատին մէջ բոլոր ցեղերուն, սեռերուն եւ կրօններուն հասցէին այսպիսի նախատական գրութիւններ եղած են: Մեր ենթադրութիւնն է, որ, շատ հաւանաբար, այս բոլորը կապ ունին իրարու հետ», ըսաւ Սաթըլզ:

Իր կարգին, Կլենտէյլի Հայ Դատի յանձնախումբի գրասենեակը յայտարարութեամբ մը խստօրէն դատապարտեց այս արարքը, զայն համարելով ատելավառութեան արտայայտութիւն, որ »կրաֆիթի«ի ձեւով գրուած էր Հայ ամերիկեան տարեցներու միութեան շէնքի պատերուն վրայ:

«Զայն ցեղապաշտութենէն բացի այլ բան կարելի չէ անուանել: Ցեղապաշտութիւն, որ առաւել եւս անարգական է, որովհետեւ ուղղուած է կազմակերպութեան մը, որուն միակ նպատակը տարեցներուն ծառայել է: Այս ոճրագործութիւնը պէտք է լրջօրէն հետաքննուի եւ անոր պատասխանատուները պէտք է դատուին: Ատելութիւնը եւ ցեղապաշտութիւնը տեղ չունին Կլենտէյլի մէջ», կ՛ըսուի Հայ Դատի յայտարարութեան մէջ:

«Կլենտէյլի Հայ Դատի յանձնախումբը սերտօրէն կ՛աշխատի Հայ ամերիկեան տարեցներու միութեան եւ Կլենտէյլի ոստիկանութեան հետ, որ արդէն ձեռնարկած է հետաքննական աշխատանքի», յայտնեց Հայ Դատի յանձնախումբը:

http://asbarez.com/arm/354490/Հակահայ-Դատապարտելի-Արարք՝-Կլենտէյլ/

İlk yorum yapan siz olun

Bir Cevap Yazın

%d blogcu bunu beğendi: