İçeriğe geçmek için "Enter"a basın

« ԱՐԱՍ» ՀՐԱՏԱՐԱԿՉԱՏՈՒՆԸ ՎԵՐՀՐԱՏԱՐԱԿԵՑ Ռ. ՀԱՏՏԷՃԵԱՆԻ «ԱՌԱՍՏԱՂ» ՆՇԱՆԱՒՈՐ ՎԷՊԻ ԹՐՔԵՐԷՆԸ- « ԹԱՎԱՆ»

Արաս Հրատարակչատունը որ նոր թափ տուած է իր հրատարակութիւններուն ու իրերայաջորդ կերպով թրքերէն ու հայերէն գիրքեր կը հրատարակէ, այս շաբաթ գրասէրներու տրամադրութեան տակ դրաւ մեր Խմբագրապետ Ռ. Հատտէճեանի գլուխ գործոցին՝ «Առաստաղ» վէպին թրքերէն թարգմանութիւնը։
»Առաստաղ« վէպը 1983 թուականին արժանացած էր Ալեք Մանուկեան գրական մրցանակի առաջին պարգեւին ու տպուած էր երկու անգամ։ 1997ին Թէլոս թրքերէն հրատարակչատունը Անահիտ Հազարեանի թարգմանութեամբ հրապարակ հանեց »Առաստաղ«ին թրքերէն թարգմանութիւնը որ կոչուած էր « Թավան » Տարիներու ընթացքին գիրքը այլեւս անգտանելի դարձաւ։
ԱՐԱՍ հրատարակչատունը երկար ժամանակէ ի վեր իր ցանկին վրայ էր դրած «Թավան»ի նոր ու վերանայուած տպագրութիւնը։ ԱՐԱՍ ի հաւատարիմ ընթերցողները անհամբերութեամբ կը սպասէին որ այդ ծրագիրը իրականանար։ Այժմ ուրախ ենք որ ծրագիրը իրականացաւ Անահիտ Հազարեանի վերանայուած թարգմանութեամբ ու Շաբաթ օր արդէն հասաւ ԹԻՒԵԱՓ գիրքի տօնավաճառին։
ԱՐԱՍ հրատարակչատան կողմէ ճաշակով տպուած գիրքի կողքը, ինչպէս միշտ, այս անգամ ալ պատրաստուած է Արէտ Կըճըրի կողմէ որ շատ պարզ բայց շատ յատկանշական կողք մը պատրաստած է, միայն առաստաղին վրայ թառած ճանճի մը նկարով։ Գիրքը հրատարակութեան պատրաստուած է Արման Կէպէնլիօղլուի կողմէ։ Գիրքին մէջ տեղ տրուած է նաեւ Ռ. Հատտէճեանի հին շրջաններու մէկ դիմանկարին որ ողբացեալ լուսանկարիչ Արա Կիւլէրի գործն է։
ԱՐԱՍ հրատարակչատունը անկասկած շատ թանկագին ծառայութիւն մը եւս մատուցած կþըլլայ իրականացնելով « Առաստաղ »ին թրքերէն նոր հրատարակութիւնը, որովհետեւ այս կերպով վէպին մասին գաղափար մը պիտի կարենան կազմել բոլոր այն գրասէրները որոնք հայերէն չեն կրնար կարդալ։ Ինչպէս քանիցս գրուած է, « Առաստաղ » վէպը պատմութիւնն է մեր ժողովուրդին, որու զաւակները օր մը գաւառի կեանքը թողուցին մեծ քաղաք գալու, անկէ վերջ ալ արտասահման դէպի օտարութիւն գաղթելու համար։
« Առաստաղ »ը ունեցաւ իր շարունակութիւնն ալ՝ « Առաստաղին միւս կողմը »ը, որ տակաւին թրքերէնի թարգմանուած չէ։ Փափաքելի է անշուշտ որ օր մը կարգը այդ երկրորդին ալ գայ։
Անգամ մը եւս կը գնահատենք ԱՐԱՍ հրատարակչատան խանդավառ աշխատախումբին կատարած գործը։ Հրատարակչատան ցարդ հրատարակած հայերէն ու թրքերէն գիրքերու ցանկը անհաւատալիօրէն երկար է։ Կը սիրենք մաղթել որ այս թափը չի տկարանար, հրատարակչատունը կը շարունակէ գրասէրներու տրամադրութեան տակ դնել գրական կամ պատմական ընտիր նոր գործեր։



Normarmara

İlk yorum yapan siz olun

Bir Cevap Yazın