İçeriğe geçmek için "Enter"a basın

Հայրապետական Սուրբ Պատարագ՝ Միլանի Սուրբ Քառասուն մանկանց եկեղեցում

Գարեգին Երկրորդ Ամենայն Հայոց Կաթողիկոսի ձեռամբ Միլանի Սուրբ Քառասուն մանկանց եկեղեցում հոկտեմբերի 21-ին մատուցվեց Սուրբ եւ Անմահ Պատարագ: Ամենայն Հայոց Կաթողիկոսն Իտալիայի հայոց հովվության հոգեւոր դասի եւ վարչական խորհրդի հրավերով մեկնել է Իտալիա` հանդիսապետելու Սուրբ Քառասուն մանկանց եկեղեցու կառուցման 60-ամյակին նվիրված արարողությունները:

Հայրապետական Սուրբ Պատարագին ներկա էին հայ համայնքի անդամներ,  Միլանում եւ Իտալիայում գործող հայկական ազգային հաստատությունների ղեկավարներ եւ ներկայացուցիչներ, Իտալիայի Հանրապետությունում ՀՀ արտակարգ եւ լիազոր դեսպան տիկ. Վիկտորիա Բաղդասարյանը, Միլանում ՀՀ պատվո հյուպատոս տիար Պիետրո Քուչուկյանը, ինչպես նաեւ Միլանի էկումենիկ խորհրդի անդամներ:

Սրբազան արարողության ընթացքում Նորին Սրբությունն Իտալիայի հայությանը փոխանցեց հայրապետական իր օրհնությունը, շնորհավորանքներն ու բարեմաղթանքները` ուրախություն հայտնելով հիշարժան այս առիթով վերստին հանդիպման եւ միասնական հոգեպարար աղոթքի հնարավորության համար:

«Քրիստոնեական մեր կյանքում, սիրելիներ, մեծ խանդավառություն է եկեղեցու կառուցման հիշատակումը, քանզի եկեղեցու սուրբ ավազանից ծնվածներիս համար չկա նվիրական այլ վայր, քան եկեղեցին: Տիրոջ սուրբ տաճարում երկնառաք բարիքներով լիանում են հավատացյալների հոգիները, լցվում մխիթարությամբ, առատանում Սուրբ Հոգու շնորհներով: Եկեղեցու կամարների ներքո մեր հոգիներում սերմանվում են հույսն ու սերը, զորանում հավատքը եւ լույս տալիս մեր մտքի եւ հոգու տեսողությանը, որպեսզի եկեղեցիացած՝ մեր քայլերը հաստատուն պահենք Տիրոջ շավիղներում եւ արժանի դառնանք Քրիստոսի պարգեւած փրկության շնորհին՝ երկնային արքայության երանությանը:

Այս մեծագույն իղձով, որը նպատակն է քրիստոնեական կյանքի, մեր ժողովրդի զավակները որտեղ եւ ապրեցին՝ կառուցեցին իրենց եկեղեցիները, որ ապրեն աստվածային սրբության ու օրհնության մեջ եւ անխախտ հավատարմությամբ՝ առաքելահաստատ մեր Եկեղեցուն ու աստվածակառույց Սուրբ Էջմիածնին: Հավատքի եւ եկեղեցասիրության այս վկայությունը վառ կերպով բերում եք նաեւ դուք, սիրելիներ, Իտալիայում ապրող հայորդիներդ: Ձեր բարեպաշտությունը, հավատարմությունը քրիստոնեական մեր ինքնությանն ու արժեքներին, հիմքն են այս օրհնյալ երկրում ձեր հանդեպ հարգանքի ու վստահության եւ ձեր հաջողությունների, որովհետեւ Աստված բարիք է պարգեւում խոնարհ սրտով եւ մաքուր հոգով Իր շնորհները ընդունողներին:

Իտալիայում ապրող հայերիդ միջոցով ամրանում են քրիստոնյա մեր երկու ժողովուրդների եղբայրական կապերը, եւ այսօր նաեւ՝ բազմակողմանի դարձող համագործակցությունը Իտալիայի եւ Հայաստանի միջեւ», – նշեց Ամենայն Հայոց Կաթողիկոսն իր պատգամում:

Վեհափառ Հայրապետը նաեւ խոսեց յուրաքանչյուր հայորդու կողմից Հայրենիքի հանդեպ պարտքի մասին: «Մեր ժողովուրդն այսօր Հայաստանում վերափոխումների նոր հույսերով է լցված եւ հավատում է հայրենի երկրի զարգացման նոր ընթացքներին ու բարի ապագային, որը պիտի կերտենք առ մեր Տերն ապավինությամբ, միասնաբար ու միմյանց աջակցելով: Մեր նվիրումով ու ընդհանուր ջանքերով մեր հայրենիքը պիտի դարձնենք ազգային կյանքի եւ ազգային իղձերի ամուր պատվարը: Հայրենիքը մեր ժողովրդի կենսագրությունն է, պատմությունը, մեր սրբություններն ու արժեքներն են, քրիստոնեական նկարագիրը:Այս ճանաչողությունն ու հավատքի ոգին է, որ պիտի փոխանցենք մեր զավակներին: Նրանց համար նույնպես հասկանալի պիտի լինի, թե ինչո՛ւ իրենց նախնիները մեծ փորձությունների մեջ անգամ, աշխարհե-աշխարհ սփռվելով անգամ, չեն դադարել դպրոց ու եկեղեցի կառուցել, չեն ուրացել հավատքն ու հայրենին:

Պատգամի ավարտին Նորին Սրբությունը հայցեց, որ Տերը ամենուր հայ ժողովրդին պահպանի արի հավատքով, շեն պահի հայոց եկեղեցիները ու պայծառ՝ քրիստոնեական ոգին:

Ամենայն Հայոց Կաթողիկոսն աղոթք բարձրացրեց առ Երկնավոր Հայրը, որպեսզի Իր օրհնության ներքո մեր ժողովրդին պահի անփորձ ու անվտանգ, մեկ ու միասնական՝ իր Սուրբ Եկեղեցիով, իր Սուրբ Էջմիածնով եւ նվիրական իր հայրենիքով:

Միլանի եկեղեցու կառուցման 60-ամյակի առիթով Հայրապետը տաճարին ընծայեց Հայոց Ցեղասպանության սուրբ նահատակների սրբապատկեր:

Հավարտ Սուրբ Պատարագի տեղի ունեցավ Աջհամբույրի արարողություն, որի ընթացքում պատարագին մասնակից բոլոր հավատացյալները հնարավորություն ունեցան ստանալու Ամենայն Հայոց Կաթողիկոսի օրհնությունը:

Նույն օրը երեկոյան ի պատիվ Վեհափառ Հայրապետի եւ նրա շքախմբի Միլանի Հայ տանը տեղի ունեցավ ընդունելություն, որին հրավիրված էր մասնակցելու ողջ համայնքը: Ընթերցվեց Իտալիա այցի կապակցությամբ Նորին Սրբությանն ուղղված Միլանի նահանգի՝ Լոմբարդիայի շրջանային խորհրդի նախագահի ողջույնի խոսքը: Ընդունելության ընթացքում ներկաներին վերստին իր օրհնությունն ու պատգամը բերեց Գարեգին Երկրորդ Ամենայն Հայոց Կաթողիկոսը:


https://news.am/arm/news/477105.html

İlk yorum yapan siz olun

Bir Cevap Yazın