İçeriğe geçmek için "Enter"a basın

Իրանահայ անկախ կառույցների միասնական հանձնախմբի նախաձեռնությամբ Այսօր Թեհրանում մեկնարկելու է Հայոց Ցեղասպանության 100-ամյակին նվիրված ձեռնարկների շարանը

«Արաքս» շաբաթաթերթ, 23 հուլիսի 2014թ.

Թեհրանի Հայ մարզամշակութային «Րաֆֆի» համալիրի, Իրանահայ ազգային եւ մշակութային միության, Նարմաք եւ Մաջիդիե քաղաքամասերի Աշխարհատեսների հայկական կենտրոնների եւ «Արաքս» շաբաթաթերթի համատեղ նախաձեռնությամբ, այսօր երեկոյան, մեկնարկելու է Հայոց Ցեղասպանության 100-ամյակին նվիրված ձեռնարկների շարանը, որը նախատեսվում է իրականացնել տարվա ողջ ընթացքում:

Այս շարանի առաջին եւ երկրորդ ձեռնարկները լինելու են բանախոսական երեկոներ՝ թուրքագետ Տիրան Լոքմագյոզյանի բանախոսությամբ.
Առաջինը՝ այսօր, հուլիսի 23-ին, երեկոյան ժամը 8-ին, Իրանահայ ազգային եւ մշակութային միության կենտրոնատեղիում,
Երկրորդը՝ ուրբաթ, հուլիսի 25-ին, երեկոյան ժամը 7:30-ին, ՀՄՄ «Րաֆֆի» համալիրի «Սայաթ Նովա» սրահում:
Հանձնախումբը հանուն ազգային միասնականության, տարվա ընթացքում կայացող իր բոլոր ձեռնարկների համար օգտագործելու է 100-ամյակի Կենտրոնական հանձնախմբի կողմից ընդունված լոգոն եւ որմազդերը:
Տիրան Լոքմագյոզյանը ծնվել է Թուրքիայի Ստամբուլ քաղաքում: Գերմանիայում, ավարտել է տեխնիկական ուսումնարան, զուգահեռ կատարել է իր առաջին երաժշտական քայլերը, հայազգի հայտնի ջութակահար ու երգահան Լուդվիգ Բազիլի մոտ: 1989-ին ավարտել է Ստամբուլի համալսարանի պետական երաժշտանոցը: 1990-92 թթ. կատարելագործվել է Երեւանի Կոմիտասի անվան պետական երաժշտանոցում:
1990-ից աշխատում է Երեւանի գրականության եւ արվեստի թանգարանում գտնվող Կոմիտասի ձեռագրերի վրա: Կոմիտասի մասին կարդացել է բազմաթիվ դասախոսություններ եւ տպագրել հոդվածներ տարբեր հանդեսներում: Այժմ պատրաստել է տպագրության նյութեր Կոմիտասի գերմաներեն եւ թուրքերեն երաժշտական ժառանգության վերաբերյալ:
Համահեղինակ է թուրքերեն լեզվի դասագրքի, սահմանված բուհերի համար: Բազմաթիվ թուրքագիտական սեմինարներ է անցկացրել Հայաստանի բուհերում: Ունի բազում թարգմանություններ հայերեն-թուրքերեն-գերմաներենի միջեւ: Հանդես է գալիս մամուլում հոդվածներով՝ մշակութային եւ քաղաքագիտական, մասնավորապես թուրքագիտական թեմաներով:
1998-2008-ը գրել է Հրանդ Դինքի «Ակօս» շաբաթաթերթում եւ հանդիսացել որպես «Ակօս»-ի Հայաստանի ներկայացուցիչ:
2008-ից Երեւանի պետական համալսարանի արեւելագիտության ֆակուլտետի թուրքագիտության ամբիոնում դասավանդում է թուրքերեն լեզու:
2013 թվականից ունի հեղինակային հաղորդում «Impuls Radio 106.5»-ում Թուրքիայի մասին, «Կիսալուսնի վերջամուտը» վերնագրով:
Հեղինակն է Կոմիտաս վարդապետի մասին թուրքերեն լեզվով հրատարակված առաջին կենսագրական գրքի:

Yorumlar kapatıldı.

%d blogcu bunu beğendi: